Hakerek-nain : Rafael Ximenes de A. Belo.

“Aniversáriu TATOLI,I.P nian ida ne’e no (iha tempu sira seluk tuir mai) labele sai de’it momentu komemorativu ida, maibé sai mós tempu oportunu, momentu refletivu atu hateke dook liután, atu bele mellora beibeik nia aan tuir ejizénsia no evolusaun tempu, iha ámbitu hala’o nia knaar ho presta informasaun ba públiku”.

Hakerek-nain : Rafael Ximenes de A. Belo

Loron aban, hahú ohin. Horisehik memória, ohin realidade no aban esperansa (provérbiu). Nune’e (tinan-haat bá kotuk), iha loron 27 jullu 2016 mak hanesan loron ohin (27 jullu 2020) Agência Noticiosa Timor-Leste (ANTIL), ofisialmente eziste nu’udar “embriaun”. Nune’e, loron ohin ANTIL komemora tinan ba da-haat no nu’udar TATOLI-Agência Noticiosa Timor-Leste,I.P (Institutu Públiku).

TATOLI,I.P eziste tuir dekretu lei Nú. 21/2017 de 24 de maio liuhusi Rezolusaun Governu Nú. 9/2016/ de 14 de março.

Ezisténsia ANTIL no agora TATOLI, bele dehan hahú husi “zero” no konsidera foun tebes iha sosiedade informativa timoroan sira nian iha era independénsia Timór nian. Maibé, Timor-Leste nu’udar nasaun, nu’udar Estadu, presiza iha nia órgaun komunikasaun sosiál rasik hodi promove no defende interrese Estadu no sidadaun nian ba garante direitu públiku ba asesu informasaun, tuir Konstituisaun Repúblika Demokrátika Timor-Leste (K-RDTL), iha artigu 40 (Liberdade ko’alia no informasaun ninian).

Tanba ne’e, Governu Timor-Leste liuhusi Sekretáriu Estadu Komunikasaun Sosiál (SEKOMS) iha Sestu Governu Konstitusionál, hahú Lei Komunikasaun Sosiál, Kapítulu V (Órgaun no Meiu Komunikasaun Sosiál) alinea haat, hahú loke konkursu públiku bá timoroan sira no ikusmai nia rezultadu finál fó-sai iha loron 10 maiu 2016 katak konkorrente nain hitu: Manuel Pinto, Rita Almeida, Rafael Ximenes de Assis Belo, Xisto Freitas de Piedade, Maria Auxiliadora, Zezito da Silva no Juliah Chatarina Lapudooh mak selesionadu ka elijível hodi dinamiza no funsiona Ajénsia notisioza Timor-Leste (ANTIL); embriaun, haktuir bá vizaun, misaun no objetivu ajénsia notisioza Estadu nian.

Atu konkretiza “trilojia” tolu mensiona iha leten, iha salaun Otél Novo Turismo, iha loron 27 fulan jullu tinan 2016 liuhusi Primeiru-Ministru, Rui Maria de Araújo, lansa ofisialmente embriaun ajénsia notisioza ne’e no ofisializa rekrutadu nain hitu hodi sai jornalista estajiáriu, hala’o knaar jornalístika iha embriaun ajénsia estatál nian ne’e. Estajiáriu sira ne’e maioria la’ós foun iha “vida jornalizmu” no “oin foun” iha komunidade mídia sira-nia leet, maibé “foun” tebes iha ajénsia notisioza Estadu nian, iha tinan 2016.

Iha natureza ajénsia notisioza nu’udar “embriaun”, bele dehan la’ós buat hotu fásil no perfeitu. La iha edifísiu ida própriu, institusionalmente la iha lideransa, la iha sistema ida ne’ebé mak estabelese, la iha rekursu materiál sira adekuadu, tanba entre jornalista sira ne’e balun uza sira-nia meiu rasik hanesan telefone no pulsa, la’o bá mai halo kobertura hodi buka informasaun ho la’o ain no hala’o servisu iha de’it “cobe house” kuadradu ida sein Aar Kondisionadu ka AC ne’ebé bele funsiona ho di’ak, durante tinan rua resin. Sasán balun hanesan meza, kadeira no armáriu sira ne’ebé jornalista sira uza ne’e mós pertense bá propriedade SNA (Servisu Nasionál Intelejénsia) nian no uza ho provizóriu de’it.

La’ós ne’e de’it, iha périodu funsionamentu servisu embriaun Ajénsia notisioza Timor-Leste, bainhira jornalista sira tuun ba terrenu halo kobertura, dalabarak hasoru fonte informasaun oioin maibé sira rasik la hatene no dúvida ho prezensa husi jornalista sira ne’e. Tanba ne’e, durante kobertura, serbisu extra ida ne’ebé mak jornalista sira ne’e halo mak introdús no promove mós embriaun ANTIL ne’e bá fonte informasaun sira, tantu governante, sosiedade sívil, nune’e mós públiku enjerál, husi loron ba loron, husi tempu ba tempu.

Nune’e mós dinámika polítika iha rai-laran implika no difikulta mós prosesu transformasaun “embriaun” ANTIL ne’e hodi sai nu’udar ajénsia ida, tuir natureza ajénsia Estadu ida nian loloos tanba embriaun ne’e moris de’it ho orsamentu bens no servisu maizmenus rihun 35$, ne’ebé prevee husi Sétimu Governu Konstitusionál no mós Orsamentu Duodésimu hodi implika mós ba toma pose Konsellu Diretivu ajénsia notisioza Estadu Timor-Leste nian ne’e.

Biar nune’e, tanba responsabilidade, maske dalaruma “tutur labele, hulan la biban, lori labele, sein iha segundu ka mínutu ida, husik monu-leet bá-rai (ANTIL)”; karik, linguajen populár ida-ne’e mak prega-metin iha jornalista estajiáriu nain hitu ne’e nian fuan no kakutak, iha momentu “dífisil” no tempu “krusiál” ne’ebá. No, idai-idak kaer-metin ba prínsipu sira hanesan: Nunka Baruk Atu Aprende (Manuel Pinto), Iha Dezafiu Maibé Ami Iha Ekipa Ida Solida (Maria Auxiliadora), Dezafiu Hanesan Mestre (Xisto Freitas), Halibur Diferensa, Disiplina Iha Asaun Halo Mehi Sai Realidade (Rafael Belo), Kontinua Hateke Bá Oin (Zezito da Silva), Kontinua Aprende (Rita Almeida) no Casa de Ferreiro, Aspeito de Pau (Julia Chatarina), sita iha livru TATOLI Nia Ain-Le’ut (2019, p.23-46).

Tanba ne’e, ho difikuldade no limitasaun oioin ne’ebé jornalista estajiáriu sira ne’e hasoru no hetan la’ós motivu ida atu mínimiza esforsu hotu, maibé nu’udar korajen ida, espiritu luta foun ida bá konkista sasidik eh dezafiu sira iha karreira jornalístika. Ho nune’e, ho responsabilidade ne’ebé jornalista sira ne’e asume, kada fulan, prodús notísia besik atus rua, iha périodu 2016 to’o 2019.

Produtu notísia no informasaun sira ne’ebé jornalista sira ne’e oferese kompostu husi: 1) Informasaun jerál ne’ebé mak disponibiliza husi públiku utilizadór informasaun-merkadu públiku-ho karakter presu padraun/presu jerál ne’ebé mak relativu baratu (General News and Information-Mainstream News Agency Products); 2) Informasaun ne’ebé mak husu no enkomenda atu buka no elabora ba interrese utilizadór informasaun sira, kliente ka merkadu espesífiku ho karakter presu padraun/presu jerál ne’ebé mak relativu karun (Taylor-made Information, Insight Information & Classified). Produtu jornalístiku sira ne’e, sira oferese bazea ba koñesimentu ne’ebé hetan iha Kantor Berita Antara, Indonézia no Agência Lusa, Portugal, bainhira hetan oportunidade hodi tuir formasaun iha nasaun rua ne’e, biar iha implementasaun seidauk dook husi perspetiva ema hotu nian, tanba razaun balun mensionadu anteriormente, iha tempu ne’ebá.

Dezafiu ba dezafiu, finalmente, iha loron 21 fulan dezembru tinan 2018, Governu liuhusi Sekretáriu Estadu Komunikasaun Sosiál (SEKOMS) fó posse ba primeiru prezidente Konsellu Diretivu TATOLI,I.P nian, inklui tuir mai refere tan nia vise nain rua (redasaun no administrasaun), ho mandatu tinan haat no mós fiskál úniku. Nune’e, hahú funsiona estrutura redasaun (interinamente), prepara regulamentu ba redasaun no servisu administrasaun sira hodi permite bá funsionamentu loloos tuir regra instituisaun públika nian.

Tanba ne’e, iha aniversáriu TATOLI,I.P nian ida ne’e no (iha tempu sira seluk tuir mai) labele sai de’it momentu komemorativu ida, maibé sai mós tempu oportunu, momentu refletivu atu hateke dook liután, atu bele mellora beibeik nia aan tuir ejizénsia no evolusaun tempu, iha ámbitu hala’o nia knaar ho presta informasaun ba públiku.

Nune’e, ezisténsia TATOLI,I.P ne’e, tantu horisehik nune’e mós ohin no aban, nafatin:

  • Sai fonte informasaun ofisiál Estadu sira Timor-Leste ne’ebé iha kapasidade no kbiit elabora produtu informasaun no notísia ne’ebé nesesita husi públiku utilizadór informasaun iha eskalaun nasionál, rejionál no internasionál;
  • Nu’udar implementadór konstituisaun ne’ebé sai dever governu nian atu fornese informasaun ne’ebé kredivel no loos no mós sai direitu informasaun sosiedade Timor-Leste ne’ebé garantidu husi artigu 40 no 41 konstituisaun Timor-Leste nian;
  • Nu’udar instituisaun komunikasaun informasaun, Agência TATOLI,I.P la’ós de’it sai produtór informasaun maibé mós iha papél nu’udar “National information clearing house” (Uma-mahon ba fó-sai informasaun nasionál ho loloos): Iha tarefa fó klarifikasaun no informasaun serteza, halakon misinformasaun (informasaun sala) no desinformasaun (informasaun ne’ebé kontradís ho verdade). Bele sai nu’udar “Fatin istória” no “hakerek-nain ba istória” pátria, nasaun, sosiedade no mós nu’udar “maklibur no fornesedór informasaun públiku”;
  • Nu’udar padraun ba kompeténsia jornalístika ba jornalista Timor-Leste ne’ebé sempre bele prodús produtu informasaun: Karreira jornalístika ne’ebé iha kualidade tuir dinámika sosiál no nesesidade informasaun sosiedade no Estadu nian;

Atu pontu haat ne’e bele funsiona ho efetivu no efisiénsia, iha prezente no futuru, hakerek-nain sita hanoin balun husi Prezidente TLPU (Timor-Leste Press Union), Manuel Pinto, rezultadu hotu tenke hahú ho IDEIA no define ho OBJETIVU ida klaru. Nune’e, bele hamosu MÉTODU no ESTRATÉJIA, hodi atinji objetivu ne’e ho rezultadu ida.

Ho hanoin ne’e, hakerek-nain énfaze atu produtu ajénsia notisioza Estadu Timor-Leste nian sira ho forma hotu husi kareira reportajen, hakerek no gravasaun husi akontesimentu oioin, fenómenu no faktu hotu iha modelu: 1) Notísia; 2) Informasaun antesedente (background); 3) Dadus negósiu, finansa no komérsiu inklui investimentu-indústria; 4) Opiniaun. 5) Features; 6) Analiza; 7) Taylor-made information; 8) Clipping transmisaun eventuál/akontesimentu audio-vizuál; inklui, 9) Dokumentasaun foto/imajen; funsiona tuir nafatin NORMA JERÁL TATOLI,I.P nian (Akurásia, rigór, independente, izenta, klareza, integridade), respeita, valoriza no promove estatutu editoriál TATOLI,I.P nian.

Inklui mós, prinsípiu universál jornalizmu no kódigu deontolójiku jornalizmu nian ho haktuir bá prinsípiu notisiabilidade (valór no elementu notísia) no kritéria elementu notísia ho padraun PSO (Public Service Obligation) ho OSS (Estate Service Obligation) hodi bele sai “Frente ba construction of reality”, tuir Akadémiku Pé. Martinho Gusmão (2019) no defende Identidade TATOLI nu’udar ajénsia notisioza Timor-Leste nian no sai National Information Clearing House (Uma-mahon ba fó-sai informasaun nasionál ho loloos): Iha tarefa fó klarifikasaun no informasaun serteza, halakon misinformasaun (informasaun sala) no desinformasaun (informasaun ne’ebé kontradís ho verdade).

Nune’e mós, sai “trend-setter” fontes notísia no informasaun nasionál ne’ebé iha kualidade, krédivel no nesesitadu husi públiku utilizadór informasaun (vizaun), iha nível nasionál, rejionál no internasionál ho karakter multimedia, multiplataforma no multitarefa (multitasking) ho kreativu, inovativu, modernu no avansadu.

To’o iha faze ida ne’e, entidade hotu nia kolaborasaun, partisipasaun no kontribuisaun (direta no indireta)  importante tebes, iha aspetu oioin.

Parabéns TATOLI!

Hakerek nain jornalista TATOLI, IP

E-mail : rafael.enf009@gmail.com

Facebook : Rafy Belo Atl

Artigu ne’e hanoin no responsabilidade pesoál

HAKEREK NO HATÁN

Please enter your comment!
Please enter your name here