DILI, 25 jullu 2020 (TATOLI)—Lutadór Timoroan Mixed Martial Arts (MMA), Abro Fernandes, hateten iha ámbitu komemora aniversáriu Agência TATOLI ba dahaat (27 jullu 2017-27 jullu 2020) ne’e, Agência TATOLI tenke iha mehi atu hamosu live streaming no foka barak mós ba iha área desportu, tanba ho desportu mak bele muda ema-nia mentalidade “muturabu” sai “mututaba”.
“Ba oin, Agência TATOLI tenke iha mehi atu hamosu live streaming tanba iha era dijitalizasaun ne’e ema barak liu mak gosta haree no rona de’it. Se bele mós, ba oin foka barak mós iha área despotu no edukasaun nian para ita-nia komunidade labele mout beibeik iha área polítika hodi loron no kalan kontra malu no ataka malu de’it. Tanba únika liuhosi desportu mak bele muda ema-nia mentalidade ‘muturabu’ ne’e ba fali ‘mututaba’,” dehan Abro Fernandes ba Agência TATOLI liuhosi entrevista via WA, domingu ne’e.
Aleinde ne’e, nia hateten, Agência TATOLI la’os de’it hakerek notísia iha dalen Portugés no tetun de’it maibé bele aumenta tan departamentu Inglés no Maláiu (Bahasa Indonézia) atu nune’e bele iha diversidade publikasaun liuhosi dalen Inglés no dalen Maláiu.
“Se bele karik, TATOLI hakerek mós ho dalen Inglés no Maláiu tanba ita iha Asia ne’e, ema barak liu mk komprende dalen inglés no maláiu duké dalen portugés,” Abro Fernandes fó sujestaun.
Tanba, tuir observasaun ne’ebé nia halo ba publikasaun durante ne’e, durante ne’e TATOLI sempre fó sai situasaun real ho faktu sira ne’ebé akontese iha terrenu no nunka inventa faktu ka istória. Nia dehan, leitór sira nunka kestiona fonte sira tanba TATOLI sempre fó sai aspeitu hotu-hotu hanesan polítika, desportu no sosiál iha Timor-Leste hodi divulga ba rai liur ho dalen Tetun no Portugés de’it.
Iha ámbitu komemora aniversáriu Agência TATOLi ba dahaat ne’e, lutadór MMA no leitór Abro Fernandes hato’o mensajen katak ba oin TATOLI bele sai mídia ida ne’ebé forte no susesu hodi habelar informasaun, tanba liuhosi infromasaun sira-ne’e mak bele eduka sosiedade Timor-Leste no lori Timor-Leste ba mundu tomak.
“Tanba ne’e, ha’u hakarak hato’o parabéns ba konsellu diretivu, jornalista no staf sira iha Agência TATOLI ne’ebé selebra aniversáriu TATOLI nian ba daahat ne’e. Ha’u iha mensajen badak ba TATOLI katak, ba oin, TATOLI bele sai mídia ida ne’ebé forte no susesu iha habelar informasaun ba públiku atu nune’e bele eduka sosiedade Timor-Leste lori Timor ba mundu,” Abro Fernandes tatoli hela lia-tatoli.
Entretantu, iha estatutu hateten Agência TATOLI,I.P nu’udár ajénsia ofisiál estadu Timor-Leste nian no nia ezisténsia maihosi inisiativa Sekretáriu Estadu Komunikasaun Sosiál (SEKOMS) iha tinan 2012-2017.
Ajénsia estadu ne’e hetan aprovasaun iha Konsellu Ministru no publika iha Jornál, Repúblika iha loron 14 fulan marsu 2016, nu’udár embriaun ho naran ANTIL ne’ebé lansa hosi Primeiru-Ministru, Rui Maria de Araújo, iha loron 27 fulan Jullu 2016 no iha fulan marsu 2017, Konsellu Ministru aprova ANTIL sai Tatoli, nu’udár ajénsia ofisiál Estadu Timor-Leste nian no públika iha Jornál Repúblika.
Jornalista : Cipriano Colo
Editór : Cancio Ximenes
