Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI, 24 jullu 2020 (TATOLI)–Iha ámbitu komemorasaun aniversáriu Agência TATOLI ba dahaat (IV) ne’ebé sei selebra iha 27 jullu semana oin ne’e, Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, husu ba jornalista Agência TATOLI tenke uza termu dignu no terminolojia ne’ebé loos hodi komunika informasaun ba “Ema ho Defisiénsia Sira”.

Notísia Relevante: TATOLI Tenke Kompete ho Ajénsia Notisioza Internasionál Sira

“Ba ha’u mak ne’e. Iha 27 jullu agora, Agência TATOLI halo aniversáriu ba dahaat ona. Ami “ema ho defisiénsia sira” mak ne’e. Oinsá ho jornalista sira-nia interasaun ho “ema ho defisiénsia sira” liuliu termu ne’ebé dignu hodi komunika informasaun liuhosi reportajén. Jornalista ka editór sira tenke uza terminolojia ne’ebé mak loos hodi komunika ba ema ho defisiénsia sira,” dehan Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, ba Agência TATOLI iha nia knaar fatin, Manleuana, Dili, sesta ne’e. 

Gaspar Afonso hatutan, jornalista sira labele uza terminolojia tuan hanesan matan-aat no tilun-diuk hodi ofende ka fó trauma ba “ema ho defisiénsia sira” tanba liafuan ne’e la merese hodi utiliza. 

“Tanba termu ida uluk ne’e maski ita-boot (jornalista) sira laiha intensaun hodi komunika maibé bainhira to’o iha ami-nia tilun, ami sente katak liafuan sira-ne’e la merese uza ba ema ho defisiénsia sira. Ezemplu, matan-aat, tilun-diuk, ain-aat, liman-aat, beik, bulak, hirak ne’e la merese komunika ba ami,” nia dehan. 

Tuir nia, bainhira komunika dehan “aat” mak ema hanoin “ema ho defisiénsia” ne’e aat no labele halo buat hotu. Tanba ne’e mak, nia dehan, Governu kria rasik projetu lei ida hodi fó subsídiu ba fulan ne’e dala-ida.

“Entaun ema hnaoin ami labele halo buat ida. Ne’ebé, osan $30 ne’e, bele rezolve buat hotu ba ema ho defisiénsia sira. Afinál la’ós hanesan ne’e maibé ema ho defisiénsia mós iha talentu lubuk ida. Ezemplu kiik ida mak ema ho defisiénsia sira ba kompete desportu iha rai liur, bainhira eventu hotu, ami fila, fila nunka mamuk maibé ami sempre fila ho medalla,” nia hateten.

Tanba, nia dehan, ema ho  kontribui ba dezenvolvimentu nasionál ne’e la’ós la ho ema defisiénsia de’it la’ós la ho ema defisiénsia de’it maibé ema hotu nia kontibuisaun hodi hadau ukun rasik-aan.

“Ami hatene katak kontribui ba dezenvolvimentu nasionál ne’e la’ós la ho ema defisiénsia de’it, la’ós ema ne’ebé mak laiha kondisaun defisiénsia maibé dezenvolvimentu ne’e ema hotu nia partisipasaun,” nia esplika.

Tanba ne’e, nia husu ba Agência TATOLI atu hamosu ka komunika terminolojia ne’ebé mak edukadu no labele ofende fali ema ho defisiénisa sira-nia dignidade.

“Ami husu katak TATOLI bele halo buat hirak ne’e hodi sai diferente ho ajénsia mídia sira seluk, atu nune’e labele uza terminojia ne’ebé mak la merese mak hodi ofende fali ema ho defisiénsia sira-nia dignidade,” Gaspar Afonso hateten. 

Notísia Relevante: Aniversáriu Agência Tatoli, Ministru Francisco: “Tatoli Tenke Marka Diferensa no Sai Referénsia”

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here