Ministra Negósiu Estranjeiru no Kooperasaun (MNEK), Adalgiza Albertina Xavier Reis Magno. Imajen/Egas Cristovão

DILI, 23 jullu 2020 (TATOLI)-Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten Timoroan na’in sanulu iha Austrália ne’ebé mak hetan inséndiu ahi han sira-nia hela fatin foinlalais konsege han mós na’in ida ninia pasaoprte.

“Governu Austrália tau matan ona ba sira no ha’u rasik husu ona ba ita-nia Embaixadora, Ines Almeida,  atu tau matan mós ba sira,”dehan Governante ne’e ba jornalista sira iha edifísiu Ministériu Finansa Ai-Tarak-Laran, kinta ne’e.

Husi sira na’in 10 ne’e, na’in sia sira-nia pasaporte seguru no na’in ida maka ninia pasaporte ahi han.

“Ida de’it mak dokumentu hanesan Pasaporte ahi han, maibé laiha buat ida governu sei tulun sira,”tenik tan.

Embaixadóra TL iha Austrália daudaun ne’e prosesa ona Timoroan ne’e ninia dokumentu.

“Ita-nia embaixada iha ne’ebá, dokumentu sira laiha problema tanba embaixada direitamente fó asisténsia ba sira,” katak Adaljiza.

Traballadór na’in 10 ne’e maka José de Jesus Viegas mak nia Pasaporte ahi han, Isaias da Costa Cardoso, Rabina de Jesus, Bernardina Leu Mau Santos, Longuinhos Afonso, Irwan da Concenção, Juliviano de Oliveira de Almeida, Leopoldino Martins Soares, Natalisto Nazario dos Santos no Abelino da Conceição.

Governante ne’e hateten Traballadór na’in 10 ne’e servisu iha programa seasonal worker iha sidade Queensland.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here