Ministru Petróliu no Minerál, Victor da Conceição Soares. Imajen Tatoli/António Gonçalves

DILI, 23 jullu 2020 (TATOLI) – Líder nasionál, Kay Rala Xanana Gusmão foin lalais ne’e manda karta ba Primeiru-Ministru, Taur matan Ruak, ne’ebé mensiona intensaun hakarak rezigna-an hosi kargu Reprezentante Espesiál Governu Timor-Leste ba Prosesu Fronteira Marítima no Dezenvolvimentu Projetu Petrolíferu iha Kampu Greater Sunrise iha Tasi Timór.

Xanana hetan nomeiasaun ba kargu ne’e iha loron 21 agostu 2018, liuhosi Rezolusaun Governu ne’ebé hetan aprovasaun iha Konsellu Ministru.

 Ba kestaun ne’e, Ministru Petróleu no Minerál, Victor da Conceição Soares, hateten katak Governu seidauk nomeia fali reprezentante espesiál tanba sei hein pedidu hosi empreza estatál, Timor Gás & Petróleu (Timor Gap) atu hili ema ida troka maka Governu liuhosi Ministériu Petróleu no Minerál (MPM) bele deside.

“Ha’u hanoin tenke haree ba nesesidade tanba bainhira ha’u halo negósiu ne’e bele la’o la persiza tán iha ema. Kona-ba ema iha ka lae ne’e depende ba nesesidade tanba orsida ita-nia Timor Gap ho parseiru maka sei serbisu hamutuk, sira rua sente katak atu halo negosiasaun ne’e presiza ema ruma atu ajuda sira no depende ba tékniku sira fó hatene mai Governu atubele hili ema,” hateten Ministru Victor hafoin ramata enkontru ho Primeiru-Ministru, Taur Matan Ruak iha Palásiu Governu, kinta ne’e.

Ministru ne’e afirma, ho rezignasaun Xanana Gusmão, la implika ba negosiasaun hodi dada kadoras mai Timor-Leste tanba akordu Negosiasaun Fronteira Máritima ho Austrália ne’e rezolvidu ona iha Nova Iorke.

“Kona-ba projetu tasi-mane hanesan kestaun téknika katak empreza Timor Gap ho empreza ne’ebé atu serbisu hamutuk ne’e klaru, ha’u nia hanoin laiha problema. Rezignasaun Xanana Gusmão hosi Xefe Negosiadór la implika no polítika rai-laran mós la influénsia negósiu, tanba bainhira ita-rua la’o hamutuk halo negósiu, rezultadu negósiu ne’e fó lukru ba ita no laiha ema ida lakon, ida-ne’e mak ita hakarak,” dehan governante ne’e.

Durante mandatu, Xanana konsege hetan konkluzaun ba negosiasaun fronteira marítima ho Governu Commonwealth Austrália ne’ebé estabelese ona Respetiva Fronteira Marítima iha Tasi Timór.

Xanana mós konsege halo negosiasaun ho empreza petrolíferu sira hodi halo akizisaun interese iha kampu petrolíferu no Timor-Leste hetan partisipasaun maioria iha dezenvolvimentu kampu no selebra ona akordu relasiona ho dezenvolvimentu kampu Greater Sunrisee.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here