Xefe Reprezentativu JICA iha Timor-Leste, Ko Goto, hatudu hela projetu apoia Timor-Leste iha setór Agrikultura no Peska. Imajen Tatoli/Jogerjo Guterres

DILI, 23 jullu 2020 (TATOLI) – Iha tinan 20 nia-laran, Ajénsia Kooperasaun Internasionál Japaun (JICA, sigla Inglés) iha Timor-Leste apoia ona orsamentu millaun $480 iha área prioridade tolu hanesan dezenvolvimentu ho hadi’ak infraestutura no sósiu-ekonómiku, promosaun no diversifikasaun indústria inklui hadi’ak no habelar prestasaun servisu sosiál.

“Ami nia ezisténisia iha Timor-Leste durante tinan 20 ona, hahú 1999 to’o 2020 kuaze osan millaun $480 mak JICA suporta ona ba Governu Timor-Leste hodi hadi’ak dezenvolvimentu ekonomia iha Timor-Leste,” tenik  Xefe Reprezentativu JICA iha Timor-Leste, Ko Goto, ba Agência TATOLI iha ninia knaar fatin, kinta ne’e.

JICA Apoia ho baze ba Planu Estratéjiku Dezenvolvimentu Nasionál (PEDN) no mós Objetivu Dezenvolvimentu Sustentável (ODS) no prespetiva asegura estabilidade, properidade no seguransa umanu iha rejiaun Sudeste Aziátiku.

“Ami-nia apoia ba projetu infraestutura foun sira  hamutuk 10-resin iha portu, resintu universidade  iha Hera, estrada, ponte, irrigasaun no plantasaun bee ho Kalkulu orsamentu $300.000,” nia subliña.

Ko Goto konsidera apoia hirak ne’e sei benefisia la’ós deit ba Governu, maibé ba povu Timor-Leste.

JICA Hamutuk ho Governu Timor-Leste hakarak atu foku ba setór agrikultura no peska.

“Iha setór agrikultura ami implementa hela projetu teknikál kooperasaun ida ba agrikultór hanaran produsaun foos lokál ho objetivu atu hadi’a no promove foos lokál la’ós ba produsaun de’it maibé nia valór ekonomiku,” nia akresenta.

Nia dehan, iha períodu COVID-19 ne’e, ajénsia kooperasaun ne’e daudaun foku ba setór saúde no mentalidade labarik sira inkliu seguransa ai-han no protesaun ba servisu.

Governu Japaun mós trasa prioridade tolu  liuhosi JICA atu apoia dezenvolvimentu no hadi’ak infraestutura no sosiu-ekoóomiku ne’ebé foku ba dezenvolvimentu kualidade, manutesaun no jestaun infraestutura, diversifika indústria atu labele depende liu ba reseita mina no gás.

JICA ajuda Timor-Leste nia esforsu iha dezenvolvimentu indústria inklui agrikultura no peska, hasa’e efisiensia no rekursu umanu iha industriál inklui kontinua fó apoia hodi dezenvolve rekursu umanu hodi bele oferese servisu sosiál ne’ebé mak benefisia kada individuál iha nasaun ne’e.

Iha setór prioridade dahuluk dezenvolvimentu ho hadi’ak infraestutura no sosiu-ekonómiku, JICA  iha projetu hasa’e kapasidade iha setór estrada, ponte no kontrola bee sa’e iha Timor-Leste, projetu re-alokasaun terminál ró pasajeiru iha Portu Dili no projetu konstrusaun ba ponte Comoro III no dezenvolve kapasidade Univercidade Nacional Timor Lorosa’e (UNTL) iha faze daruak ba fakuldade Enjiñeira, Siénsia no Teknolojia.

Prioridade daruak iha setór promosaun ba diversifikasaun indústria hanesan projetu hasa’e redimentu uma-kain agrikultór sira liuhosi haforsa produsaun foos doméstiku, fó asesoria ba dezenvolvimentu indústria, projetu ba jestaun rekursu naturál sustentável no apoia polítika no asaun kombate peska ilegál.

Prioridade ikus liu, JICA fo asesoria ba evaluasaun projetu infraestrutura, reabilitasaun no hadi’a sistema fornesementu bee-moos, hasa’e kapasidade ba Polisia Komunitáriu no hasa’e kapasidade rekursu umanu ba elaborasaun polítika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here