Logotipu Tribunál Distritál

DILI, 22 jullu 2020 (TATOLI)-Ministériu Públiku (MP) liuhosi Prokuradór titulár Jacinto Babo iha nia alegasaun husu ba Tribunál Distritál Dili (TDD) atu aplika pena efetivu prizaun tinan-ualu (8) ba arguidu MPS tanba sulan nia aman rasik ho inisiál CC iha besi-laran (atu hanesan gaiola ba sulan manu).

Prokuradór Jacinto Babo husu atu aplika pena ne’e tanba iha produsaun prova liuhosi julgamentu sira-liu prienxe elementu krime ne’ebé forte hosi aktu arguidu nian hasoru nia aman rasik.

Prova ne’ebé aprezenta ka arrola hosi MP antes ne’e katak, iha loron 30 janeiru, tinan ne’e, iha tuku 3:00 otl ekipa investigasaun PNTL Munisípiu Dili simu informasaun hosi komunidade ida katak arguidu MPS sulan hela lezada nu’udar aman rasik iha uma mamuk ida ne’ebé lokaliza iha Aldeia Avansa, Suku Bairru-Pité, Munisípiu Dili.

Bazeia ba informasaun ne’e iha tuku 4:20 Otl, ekipa dezloka ba iha fatin refere no identifika katak loos duni arguidu sulan hela lezada iha besi-laran ne’ebé arguidu solda metin paresidu ho fatin atu sulan animal sira.

Iha fatin ida arguidu solda hodi sulan lezadu ne’e kloot no la fó espasu ba lezadu atu book-an no fatin ne’e rasik la eziste odamatan no arguidu sulan lezadu ne’e kuaze fulan ida resin.

Aleinde deskobre katak, lezadu toba hela iha besi laran ho kondisaun oin kamutis, roupa uza fo’er hotu, fatin ne’e nakonu ho fo’er mak hanesan sintina boot ka ki’ik bou hotu iha besi laran, inklui bikan ho kopu ne’ebé lezadu uza ba han no hemu tau hamutuk hotu iha fatin ida ne’e.

Inisiativa hodi halo fatin ne’e hodi sulan lezadu ne’e mai hosi arguidu rasik, arguidu mak sosa material besi no arguidu mak solda rasik.

Enkuantu uma ida hodi uza sulan lezadu ne’e testemuña ho inisiál JT nian no arguidu nia uma rasik lokaliza iha Aldeia Buka Fini, Suku Bairru-Pité, Dili.

Arguidu hatama lezadu ba besi laran ho razaun katak lezadu sofre moras mental, ko’alia arbiru, ameasa ema no tuda estraga ema nia uma no  halo violentu halo viziñu sira.

Tuir observasaun médiku Virgilio Napoleão da Crus Soares ne’ebé servisu iha postu saúde Railaco-Leten, Postu Gleno, Munisípiu Ermera, katak loos duni lezadu dala barak ko’alia barak no hamnasa mesa-mesak, maibé lezadu la’ós ema violentu ho agresivu.

Relatóriu médiku hatudu katak lezadu sofre moras metan (bibi maten) ho naran bipolar, relatóriu médiku ho deklarasaun arguidu nian diferente loos tanba ne’e arguidu deside hodi sulan lezadu.

Iha dokumentu sita iha folia katak, lezadu la’ós ema violentu no agresivu tanba bainhira ofisial justisa sira ba notifika lezadu iha nia rezidénsia lezadu ko’alia di’ak ho ofisial sira katak nia la bele marka prezensa iha Ministériu Públiku tanba lezadu la’o la di’ak.

Hosi hahalok sira ne’e arguidu trata lezadu nu’udar nia aman rasik hanesan animal tratamentu kruel degradante no dezumanu no tuir loloos arguidu mak tenke tau matan ba lezadu tanba lezadu nia idade agora tinan 75 ona.

Ministériu públiku akuza arguidu hanesan ko-autór material ho forma konsumadu ba iha konkursu real, ba krime espozisaun ka abandonadu ne’ebé previstu iha artigu 143 númeru 1 alínea A, maus tratu ba inkapás ne’ebé previstu iha artigu 153 no raptu previstu iha artigu 161 hotu-hotu husi kódigu penál nian.

Defeza Agostinha de Oliveira ne’ebé fó asisténsia legal ba arguidu hateten, durante iha julgamentu sira liubá arguidu deklara ho parsialmente, tanba ne’e, husu Tribunál atu aplika pena tuir konviksaun Tribunál nian.

Hafoin rona tiha parte sira Tribunál deside adia fila-fali julgamentu ne’e ba iha loron 10 agostu, tinan ne’e, hodi rona leitura desizaun final hosi Tribunál.

Audiénsia  julgamentu ne’e prezide hosi juis koletivu, João Ribeiro, Argentino Luísa Nunes, Zulmira Auxiliadora, Ministériu Públiku reprezenta hosi Prokuradór Jacinto Babo, arguidu hetan asisténsia legal hosi Defensór Públiku Agostinha de Oliveira.

Jornalista   : Nelson de Sousa

Editór        : Francisco Simões

 

 

HAKEREK NO HATÁN

Please enter your comment!
Please enter your name here