Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 22 Jullu 2020 (TATOLI) – Relasiona ho preokupasaun deputadu opozisaun sira durante sesaun plenária ba traballadór na’in-lima ne’ebé kompañia Wartsila hapara kontratu, Ministru Obra Públika, Salvador Eugênio Soares dos Reis Pires, klarifika katak traballadór hirak ne’e la’ós resposabilidade Ministériu Obra Públika (MOP) tanba kompañia Wartsila maka fó kontratu ba sira.

“Horiseik ha’u bolu Wartsila hodi esplika situasaun ida-ne’e. Sira esplika katak traballadór na’in-lima halo infrasaun kontra kompañia, hanesan kontra protokolu kompañia nian ne’ebé sira asina kontratu ho Wartsila maibé halo greve hasoru Governu hamonu reputasaun Wartsila nian no uza farda Wartsila, ho nune’e mak Wartsila deside hapara sira-nia kontratu,” tenik Ministru Salvadór iha Palasiu Governu, kuarta ne’e.

Ministru Salvador Konta, kompañia Wartsila ne’ebé halo kontratu ho Governu, sente reputasaun monu no sira husu deskulpa ba Governu kona-ba kestaun ne’e. 

Nune’e,  kompañia estranjeiru ne’e deside halo avaliasaun dezempeñu ba traballadór na’in-lima inklui avaliasaun tékniku, kapasidade no abilidade ne’ebé ninia rezultadu hatudu sira di’ak, natón, sufisiente no mós komportamentu maka menus hafoin sira-nia asaun ne’e.

Ho nune’e, kompañia Wartsila deside hapara traballadór na’in-lima ninia kontratu.

“Kona-ba Ministru Obra Públika mak fó presaun hodi hasai, ida-ne’e laloos. Governu la mete jestaun internál kompañia nian tanba sira tama kontratu ho Wartsila, pudia sira halo greve ne’e husu ba Wartsila hodi bele hato’o fali ba Eletricidade de Timor-Leste (EDTL) hodi buka meiu própria. Ida-ne’e lisaun ida, ha’u deseja susesu ba sira nafatin no espera bele sai hanesan lisaun, ida-ne’e la’ós ami-nia maibé jestaun kompañia,” Ministru Salvador klarifika.

Iha loron 23 fulan-Marsu,  Prezidente  Repúblika deklara Estadu Emerjénsia dahuluk no tuir dekretu lei ne’ebé aprova husi Konsellu Ministru, bandu traballadór sira ne’ebé presta hela serbisu iha serbisu báziku sira halo greve.

“Entaun iha momentu ne’ebá sira halo asaun ha’u hateten sira tenke haree kondisaun Estadu Emerjénsia ne’e, ne’ebé ezije funsionáriu hotu atu presta serbisu no bele iha mós sansaun ruma ba sira iha entidade ne’ebé sira serbisu ba,” nia akresenta.

Ezekutivu ne’e dehan, iha momentu traballadór ameasa halo greve, hanesan ministériu ne’ebé tutela ba funsionamentu ka fornesimentu enérjia eletrisidade  husu atu fó sansaun desiplinar karik traballadór sira ne’ebé halo greve, la’ós atu hapara kontratu traballadór maibé kompañia halo tanba traballadór sira ne’e asina kontratu ho Wartsila la’ós ho MOP ka Diresaun Jerál Eletrisidade Timor-Leste.

“Ami-nia sujestaun ba Wartsila iha tempu ne’ebá (momentu traballadór sira ameasa atu halo greve) iha instrusaun dehan haree sansaun disiplinar ruma husi áktu sira ne’e. Maibé Wartsila informa katak traballadór la’ós ita-nia tanba iha kontratu ho Wartsila no sira maka rekruta, tanba ne’e kompaña iha liu kondisaun atu ko’alia ho traballadór sira,”Ministru haktuir.

Entretantu, Kompañia Internasionál Wartsila konsidera traballadór na’in-lima ne’e komete violasaun grave hasoru Kódigu Konduta Profisionalizmu no kontra protokolu kompañia nia hanesan falsifika lista prezensa no asinatura ba halo konferénsia imprensa maibé laiha koñesimentu jerente Sentrál Elétriku Hera no EDTL inklui kontra protokolu Estadu Emerjénsia no pandemia COVID-19.

Nune’e mós, traballadór sira ne’e uza uniforme Wartsila hodi halo konferénsia imprensa hodi husu kompensasaun ba MOP no sira-nia asaun afeita ba imajen no reputasaun Wartsila nian.

Traballadór na’in-lima ne’ebé kompañia hapara kontratu maka hanesan João Baptista Verdiál, Nélio Asunção de Jesus, Junito Estêvão Araújo Reis, Januário Ivan Dias Marçal no Elo King Benay da Costa Marques.

Kompania Wartsila sei hapara kontratu iha loron 31 jullu 2020 no sei la kontinua kontratu traballadór sira-nian, maibé sei kumpre obrigasaun ba remuneratóriu ne’ebé fixa ona iha kontratu ho traballadór sira.

Wartisila hanesan kompania internasionál ne’ebé durante ne’e halo operasaun no manutensaun ba Sentrál Elétrika Hera.

Jornalista: Florêncio Miranda  Ximenes

Editora: Julia Chatarina

HAKEREK NO HATÁN

Please enter your comment!
Please enter your name here