DILI, 22 jullu 2020 (TATOLI) – Ezekutivu sira liuhosi reuniaun Konsellu Ministru (KM) hahú diskute mekanizmu sira atu halo koordenasaun no monitorizasaun ba implementasaun reforma institusionál sira.
Aprezentasaun ne’e hosi Ministru Prezidénsia Konsellu Minstru, Fidelis Manuel Leite Magalhães, durante reuniaun ezekutivu iha Palásiu Governu, kuarta ne’e.
“Membru Konsellu Ministru sira asiste aprezentasaun rua hosi Ministru Prezidénsia Konsellu Ministru, kona-ba orsamentu tuir programa no mekanizmu sira atu halo koordenasaun no monitorizasaun ba implementasaun reforma institusionál sira,” relata Ministru Fidelis.
Governante ne’e esplika, orsamentasaun tuir programa ne’e ninia objetivu mak atu promove transparénsia iha alokasaun rekursu tuir prioridade nasionál sira no permite alkansa rezultadu hirak ne’ebé hakarak no estabele responsabilizasaun ba rezultadu hirak ne’ebé prodúz ona.
Kona-ba koordenasaun no monitorizasaun ba implementasaun husi reforma institusionál sira ne’ebé Governu implementa daudaun ho objetivu atu hadi’a jestaun no funsionamentu setór públiku nian, nune’e mós asegura katak Estadu funsiona iha kuadru legalidade no seguransa jurídika efetiva ho dalan ne’ebé efisiente no efikás liu.
Dezenvolve liuhosi área prinsipál lima, reforma institusionál boot sira maka reforma administrasaun públika, reforma jestaun finanseira públika, desentralizasaun administrativa, reforma lejizlativa no reforma judisiária.
Aprezentasaun ne’e ninia objetivu maka debate kona-ba mekanizmu koordenasaun nian sira kona-ba reforma boot lima.
Tanba medida hirak ne’e interligada no partilla objetivu komún ida, presiza atu koordena iha nível ne’ebé a’as liu ba ninia dezenvolvimentu, implementasaun no monitorizasaun, liu-liu ho kriasaun komisaun koordenadora ida ne’ebé funsiona hanesan órgaun xapeu ba koordenasaun kona-ba reforma oin-oin.
Kriasaun komisaun koordenadora sei prezide hosi Primeiru-Ministru no integra hosi ministru sira-ne’ebé sai nu’udar responsável atu estabelese diresaun no vizaun jerál hosi reforma no programa sira, koordena dezeñu, programasaun no implementasaun konsistente hosi reforma sira, promove sinerjia no kooperasaun entre reforma sira, hasai obstákulu no sobre pozisaun entre reforma sira, fó apoiu ba reforma sira no garante dezempeñu di’ak no implementasaun oportunu reforma sira.
Jornalista: Antónia Gusmão
Editora: Julia Chatarina
