Reuniaun Konsellu Ministru iha Palásiu Governu, kuarta (22/07). Imajen Tatoli/Egas Cristovão

DILI, 22 jullu 2020 (TATOLI) – Governu liuhosi reuniaun Konsellu Ministru (KM) halo ona aprovasaun ba Projetu Proposta Rezolusaun, ne’ebé aprezenta hosi Ministra Negósiu Estranjeiru no Kooperasaun, Adaljiza Magno, hodi hato’o ba Parlamentu Nasionál hodi hetan ratifikasaun, kona-ba akordu servisu aéreu entre Govenu Timor-Leste no Governu Austrália.

“Akordu ne’e ninia objetivu atu asegura liután nível seguransa no protesaun internasionál hodi reafirma preokupasaun séria ba hahalok no ameasa kontra seguransa aviaun nian ne’ebé fó risku ba ema no propriedade seguransa, ne’ebé afeta maka’as ba funsionamentu transporte aéreu no konfiasa públiku nian ba seguransa aviasaun sivíl,” informa Ministru Prezidénsia Konsellu Ministru, Fidelis Manuel Leite Magalhães, hafoin reuniaun ezekutivu iha Palásiu Governu, kuarta ne’e.

Governante ne’e realsa, akordu ne’e buka mós atu promove sistema aviasaun internasionál ne’ebé bazeia ba konkorénsia entre empreza transporte aéreu nian iha merkadu hodi enkoraja empreza sira atu dezenvolve no implementa servisu hirak ne’ebé kompetitivu no inovadór.

Antes ne’e, akordu servisu aéreu entre Timor-Leste no Austrália hetan aprovasaun hosi Governu iha enkotru Konsellu Ministru loron 14 marsu 2017.

Ho akordu ne’ebé iha, loke dalan atu halo kooperasaun aviasaun nasaun rua.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here