Vice Ministru Edukasaun Juventude no Desportu Antonio Gutteres Hamutuk ho Embaixadór Austrália iha Timor-Leste, Peter Roberts Lansamento Distribuisaun ba Pakote Higenio ba Eskola Ensino Basico no Terseiro Siklo. iha MEJD, Tersa (21/07/20). Imajen/Egas Cristovão

DILI, 21 jullu 2020 (TATOLI)-Governu Austrália liuhosi ninia Embaixadór iha Timor-Leste, Peter Roberts, iha tersa ne’e kontinua distribui apoiu fasilidades prevensaun COVID-19 ba eskola ensinu báziku primeiru no terseiru siklu iha Timor-Leste.

Peter Robert distribui apoiu ne’e simbolikamente hala’o iha edifísiu Ministériu Edukasaun Juventude no Desportu (MEJD) Vila Verde Dili, tersa ne’e.

Nia dehan, ekipamentu pakote ijiéne ne’e hamutuk 137 no kada pakote iha item 17 hodi distribui ba eskola besik atus rua iha territóriu Timor-Leste.

Fasilidade hirak ne’e kompostu husi sabaun, balde, máskara, dezinfetadu no thermometru dijitál.

“Nu’udar reprezentante povu Australianu iha Timor-Leste, ha’u hatoo mós obrigadu wa’in ba parseiru sira hanesan Plan Internasionál, CARE Internasionál, Alola Fundation, no UNICEF tanba durante ne’e sempre prontu apoiu la’o hamutuk ho Embaixada iha programa sira ne’e,” dehan Diplomata ne’e hafoin distribui pakote ijiéne iha Dili.

Tuir Nia apoiu ne’e meius ida atu fó tulun ba MEJD hodi halo prevensaun ba moras coronavirus iha Timor-Leste.

“Austrália iha kompromisu bo’ot hakarak haree labarik Timoroan sira nu’udar jerasaun foun ba nasaun ne’e bele hetan fila-fali ninia direitu iha eskola, tanba Timor-Leste presija jerasaun foun ne’ebé kualidade atu lori nasaun ne’e ba futuru ida diakliu,”tenik tan.

Iha biban hanesan Vise  Ministru Edukasaun Juventude no Desportu, António Guterres, reprezenta Governu agradese ba Austrália tanba fó ona apoiu ba Timor-Leste hodi prevene no kombate COVID-19.

“Ami laiha buat  ida atu oferese  ba governu Austrália maibé  ami konsidera no rekoñese governu Austrália sai ami nia parseria ida metin desde hori uluk to’o ohin loron,” tenik Governante.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here