Vise-Ministru Obra Públika, Nicolau Lino Freitas Belo. Imajen Tatoli/Egas Cristovão

DILI, 21 jullu 2020 (TATOLI) – Vise Ministru Obra Públika, Nicolau Lino Freitas Belo eziji kompeténsia própriu, tanba durante ne’e bazeia ba Lei Orgánika VIII Governu Konstitusionál, fó kompeténsia tomak ba Ministru Obra Públika, Salvador Soares dos Reis Pires.

“Signifika Ministru Obra Públika maka iha kompeténsia no podér hotu atubele foti desizaun intermu polítika no ezekusaun tomak. Maibé to’o ohin loron hanesan Vise-Ministru tuir órganika, halo koadjuva ka auxiliár ba Ministru atu haree ba atividade ne’ebé relasiona ho Lei ne’ebé mak define iha Lei Órganika Ministériu Obra Públika (MOP) ninian. To’o ohin ha’u-nia kompeténsia mak halai liubá inspesaun no auditoria, ha’u la halai ba diresaun, tanba diresaun hotu partikularmente direta ba Ministru,” relata Vise-Ministru Nicolau hafoin ramata entrega relatóriu annuál ba Primeiru-Ministru, Taur Matan Ruak iha Palásiu Governu, tersa ne’e.

Tanba ne’e, nia parte hato’o ona ba Xefe Governu atu define ninia kompeténsia, hodi nune’e bele hala’o knaar ho di’ak liután hodi serví povu durante mandatu.

“Ohin ha’u mai hato’o ba Primeiru-Ministru tanba mandatu VIII Governu nian hela de’it ona tinan-rua, pelu menus ha’u mós tenke iha kompeténsia própriu ida ba diresaun ruma atu nune’e atividade tomak ha’u mós bele konsentara no ninia rezultadu ne’e povu ne’e bele sente. Buat hotu sentraliza maka dezenvolvimentu bele la’o maibé la’o sidi, hanesan membru Governu ida ha’u sente ladún satisfaz tanba ne’e maka ha’u mai relata ba Xefe Governu, nune’e iha futuru bele hadi’a hodi ita-nia planu no prioridade sira ne’e bele la’o ho susesu,” Nicolau subliña.

Kompeténsia Vise-Ministru Nicolau durante ne’e maka halo inspesaun no auditoria ba diresaun Bee, Estrada no sira seluk iha MOP.

“Ha’u só identifika problema saida mak durante ne’e ministériu enfrenta,  ein termu rekursu umanu, planeamentu, ezekusaun no implementasaun,” nia akresenta.

Preokupasaun sira ne’e relata mós iha relatóriu anunál no entrega ona ba Xefe Governu.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here