Logotipu TDD. Imajen Tatoli/Dok.

DILI, 21 jullu 2020 (TATOLI) – Ministériu Públiku liuhosi Prokuradór Titulár Rogeiro Viegas, iha nia alegasaun husu ba Tribunál Distritál Dili (TDD) atu fó justisa ne’ebé justu ba arguidu LSH nu’udar sidadaun estranjeiru ne’ebé kaer pasaporte Repúblika Popular Xina.

Arguidu LSH deskonfia komete kazu fraude fiskál, kontra bandu no importasaun ilísita ba sasán merkadoria.

Liuhosi audiénsia julgamentu iha TDD, ohin, Prokuradór Rogeiro Viegas Vicente, esklarese, iha produsaun prova iha inísiu julgamentu sira, liu-ba arguidu hili ho dalan nonook no arguidu ko’alia de’it buat balun iha julgamentu primeiru interrogatóriu, rona mós deklarasaun sasin hodi junta mós ho baze faktu hosi Alfándega no PNTL ba sira-nia atuasaun iha terrenu momentu ne’ebá hodi halo apreensaun ba objetu hirak ne’e hanesan sigarru, tua ho sira seluk tan.

Nia informa, objetu hirak ne’e hotu  rai hela iha MP ne’ebé liu hotu ona prazu no so tua mak seidauk liu prazu.
Tanba ne’e, husu Tribunál atu deside ba sasán ne’ebé liu ona prazu oinsá bele halo destruisaun no sasán ne’ebé iha valór ekonómiku bele fa’an nune’e afavór hodi hatama reseita ba Estadu.

Nia hateten, iha julgamentu sira liu ba mós arguidu la aprezenta dokumentu komprovativu sira kona-ba lisensa atividade ekonómiku sira no iha julgamentu hirak liu ba mós seidauk hatene loloos kona-ba sasán importasaun sira-ne’e hosi ne’ebé, tanba parte sasin ho inisiál D nu’udar ekipa sekreta Alfándega nian iha fulan hirak liu ba mate tiha ona, nune’e objetu hirak ne’ebé halo apreensaun la konsege halo fali seka iha Sistema Alfándega nian hodi hatene loloos.

Tuir akuzasaun hosi MP nian, antes ne’e katak, iha loron 03/04/2019 , purvolta tuku 11:40 OTL, Xefe intelijente hosi Munisípiu Díli nian kontaktu ba iha komandante PNTL eskuadra Dom Aleixo hodi informa dehan, arguidu ne’ebé hela iha Hotel Fortuna, iha área Hudi-Laran, rai sasán merkadoria illegais hanesan Sigarru Stiker no Tua manas Xina nian iha karreta Hilux metan ida nia laran, no kalan mak arguidu lori sasán sira ne’e ba iha fatin karaoke atu fa’an.

Bainhira simu tiha informasaun refere, membru Polísia Patrulla hosi eskuadra Dom Aleixo ba kedas iha fatin refere, hodi identifika no deskobre loos duni iha karreta kór metan ida ho marka Hilux ho Xapa matríkula 20.219 TL tula sigarru stiker no tua Xina nian.

Momentu ne’e kedas komandante PNTL eskuadra Dom Aleixo telefone ba xefe seksaun Investigasaun Kriminál eskuadra Dom Aleixo nian, no mós ba iha Diretór Alfándega nian, atu marka prezensa iha fatin refere hodi halo prosedimentu kriminál ba sasán merkadoria ilegál sira ne’ebé arguidu tula iha karreta laran.

Sassan merkadoria ne’ebé mak membru polísia investigasaun no funsionáriu sira Alfándega, hamutuk ho arguidu LSH identifika mak hanesan, Tua manas marka Xina nian hamutuk kaixa-43 no botir-hitu (7), sigarru Marlboro Stiker Slop-20, Sigarru Sampoerna Stiker Slop-23, Sigarru L.A Stiker Slop-sia (9), Sigaru Surya 12 Stiker Slop-ida (1), Sigarru Surya 16 Stiker Slop-ida (1), no Sigarru Likun Slop-ida (1), Ai-Kameli medida centi metru 40 hamutuk-rua (2), Ai-Kameli nia uut karón nanotak ida (1), Ai-Kameli modelu musan ákua ki’ik ida, Ai-Kameli prodús ona sai kelu hamutuk 26 no tersu ida (1).

Ministériu Públiku, antes ne’e, akuza no promove arguidu ho krime tolu mak hanesan krime fraude fiskál previstu iha artigu 314 nú.1, kontrabandu 315 nú.1, no importasaun ilísita ba sasán merkadoria nú.1. Kódigu Penál Timor-Leste.

Defeza José Camões ne’ebé fó asisténsia ba arguidu hateten, durante iha periodu julgamentu sira liu ba, la fortifika krime sira ne’ebé antes ne’e MP imputa ba nia kliente.

Nia dehan, produtu hanesan sigarru merkadu sirkula so proibe ba sigarru ne’ebé laiha embalajen, maibé realidade objetu hirak ne’e arguidu la fa’an no tau de’it iha karreta laran so depois ekipa sekreta sira atuasaun mak hetan. Tanba ne’e, nia husu Tribunál atu absolve arguidu hosi krime tolu ne’ebé MP imputa.

Hafoin rona tiha parte sira, Tribunál deside adia hikas julgamentu ne’e ba iha loron 5 agostu, tinan ne’e, hodi rona leitura desizaun final.

Audiénsia julgamentu ne’e prezide hosi Juiz koletivu João Ribeiro, Julmira da Silva, Argentino Nunes, Ministériu Públiku reprezenta hosi prokuradór Rogério Viegas Vicente no arguidu hetan asisténsia hosi Advogadu Privadu José Camões.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here