Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 20 jullu 2020 (TATOLI) – Ministériu Obra Públika (MOP) identifika ona daudaun ne’e iha suku hamutuk 77 iha territóriu tomak maka seidauk asesu ba eletrisidade durante tinan barak nia-laran, tanba ne’e MOP tau ona ba planu prioridade 2021 hodi implementa pakote balun iha faze dahuluk.

“Kona-ba eletrisidade, iha suku 77 maka seidauk asesu ba enerjia eletrisidade no momentu ne’ebá ami nia-planu ba Orsamentu Jerál Estadu (OJE) 2020 atu implementa lai pakote 33 ne’ebé mak ninia dezeñu no Bill of Quantity (BoQ) prontu ona no MOP haruka ona ba Ajénsia Dezenvolvimentu Nasionál (ADN) atu halo verifikasaun. Espera iha 2021 MOP bele implementa pakote 33 ne’e,” hateten Ministru Obra Públika, Salvador Eugênio dos Reis Pires, iha Palásiu Governu, segunda ne’e.

Tuir Governante ne’e, pakote 33 eletrisidade ne’ebé sei implementa ne’e kuaze iha munisípiu hotu no ninia prioridade bazeia ba suku ne’ebé besik liu ona liña infraestrutura ka distribuisaun ne’ebé ezistente atu nune’e bele diretamente halo konesaun ba enerjia eletrisidade.

“Kuandu hakat ba suku sira ne’ebé dook hosi distribuisaun ezistente, entaun halo hotu hein fali suku ida hotu lai maka bele halo koneksaun,” nia akresenta.

Nia informa, daudaun ne’e ekipa MOP nafatin tun ba munisípiu sira atu dezenvolve liután restante suku ne’ebé seidauk iha dezeñu no BoQ atu nune’e bainhira karik iha posibilidade espasu fiskál ba MOP bele aumenta suku balun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here