PDHJ fó formasaun ba membru F-FDTL iha Munisípiu Baucau durante semana ida. Imajen/Dok. PDHJ

DILI, 20 jullu 2020 (TATOLI) – Provedoria Direitu Umanu no Justisa (PDHJ) realiza formasaun kona-ba pratika direitu umanu no boa governasaun ba membru FALINTIL- Forsa Defeza Timor-Leste (F-FDTL) na’in-25 hosi komponente Terrestre.

Notísia Relevante : PDHJ Fasilita Ona Formasaun Ba PNTL

Formasaun ho durasaun semana ida hosi loron 13-17 jullu ne’ebé envolve membru F-FDTL feto na’in-rua (2) no mane na’in-23 hala’o iha Munisípiu Baucau. Formasaun ne’e nu’udar parte ida hosi kooperasaun servisu PDHJ, Ministériu Defeza no Organizasaun Nasoins Unida (ONU) iha Timor-Leste.

Iha enserramentu formasaun ne’e, Provedora Jesuína Maria F. Gomes, esklarese, treinamentu ne’e realiza bazeia ba asina akordu hamutuk ne’ebé  hala’o ona iha 2016 ho objetivu prinsipál atu hasa’e koñesimentu no pratika direitu umanu iha kna’ar loro-loron nian no mós bele prepara forsa armada sai profisionál no di’ak liu ne’ebé hatene regra ka norma sira lei internasionál hodi respeita nafatin valores direitu umanu.

Liuhosi komunikadu imprensa PDHJ nian ne’ebé Agênçía Tatoli asesu, ohin, iha Dili, Xefe Rekursu Umanu Komponente Terrestre, Kapitaun Rui do Rosario, hato’o agradese no apresia ho programa ne’e. Nia dehan, F-FDTL mós iha ona lei kona-ba prosesu disiplinár nian, tanba ne’e liuhosi formasaun ne’e bele hafanu membru sira atu hala’o knaar nafatin tuir regra sira hodi respeita prinsípiu no valor  direitu umanu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here