Segundu Komandante Polísia Munisípiu Dili, Superintendente Asistente Xefe, Euclides Belo. Imajen/Antonio Goncalves

DILI, 20 jullu 2020 (TATOLI)- Komandu Polísia Nasionál Timor-Leste (PNTL) Munisípiu Dili liuhosi Ofisiál Polísia Suku (OPS) no Konsellu Polisiamentu Komunitáriu (KPK) koordena ho autoridade suku sira sei  tama-sai bairru hotu iha kapitál Dili hodi sensibiliza regra no programa hametin dame.

Segundu Komandante Polísia Munisípiu Dili, Superintendente Asistente Xefe Euclides Belo, informa, membru KPK hamutuk 300-resin iha Dili maka simu ona pose presiza reativa sira-nia prezensa iha bairru-laran hodi lori mehi Timoroan tomak nian atu lori Dili sai sidade dame, livre hosi konflitu no krime no sidade ne’ebé moos hosi lixu.

Nia hatutan, importante liubá grupu juventude sira no grupu Organizasaun Arte Marsiál sira koopera ho autoridade hirak ne’e hodi kontribui ba dame no hala’o viajen ba malu iha kapitál Dili labele lori sasán kro’at, tanba PNTL kontinua implementa lei arma branka númeru 5/2017.

“Ami hamutuk ho KPK sei halo operasaun ho modelu la’o ain tama sai bairru oinsá maka fó edukasaun sívika di’ak liután ba nia juventude no komunidade sira. Alvu maka ne’e la’o ho motór tenke utiliza kapasete, kumpre regra tránzitu, labele lori sasán kro’at tau iha motór no karreta no husu joven sira ne’ebé gosta hemu tua iha bairru-laran no estrada públiku sira hanesan Jardín ami hosu atu sira hapara, tanba jardín no estrada la’ós bar atu konsumu alkóliku,” afirma  Euclides Belo, ohin, ba jornalista iha Komandu PNTL, Caicoli, Dili.

Nia dehan, Komandante Munisípiu Dili, Superintendente Xefe Henrique da Costa fó ona orientasaun atu iha semana ne’e ba oin PNTL bele halo ona koordenasaun ho KPK no autoridade suku hodi hahú programa ne’e iha bairru hotu iha kapitál Dili.

Programa seluk tan maka PNTL liuhosi Seksaun Tránzitu Dili sei halo mós operasaun ba komunidade sira-nia karreta no motór aat ne’ebé tinan barak para de’it iha estrada no trotoar leten sei foti sai hotu hodi haluan espasu ba estrada públiku.

PNTL rasik halo ona identifikasaun iha área Don Aleixo, Munisípiu Dili nu’udar dalan protokolu sei halo uluk operasaun hodi muda sai hotu transporte antigu sira ne’ebé aat tinan barak para okupa estrada públiku.

“Iha dalan protokolu sira ne’ebé ami identifika iha karreta barak para iha estrada públiku, ami sei foti sai hotu, se maka lakohi koopera ami foti sira nia karreta lori ba lixu Tibar,” nia hateten.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here