Ilustrasaun hosi google.

DILI,20 jullu 2020 (TATOLI)-Instituto Nasionál Saúde (INS) ho Organizasaun Naun Govermentál Maluk Timor, segunda ne’e lansa ona programa aplikasaun haroman ba Smartphone hodi tulun informasaun ba profisionál Saúde  ne’ebé liga ho moras hada’et sira hanesan HIV SIDA, Tubercoluse, COVID-19 no seluk tan.

Programa ne’e dezenvolve husi ONG Maluk Timor hamutuk ho Catalpa atu fasilita  informasaun ba médiku, enfermeiru, parteira no pesoál saúde seluktan  atu aprende liután kona-ba prosesu atendimentu, diagnóstiku, prevensaun no meiu kurativu ba  moras hada’et sira hodi atende pasiente sira ho di’ak liután.

Projetu ne’e hetan tulun husi Governu Austrália servisu hamutuk ho INS, Ministériu Saúde, ONG Maluk Timor no Catalpa.

”Pakote formasaun ne’e sei implementa durante tinan tolu ba médiku, enfermeiru, parteira ba pesoál saúde sira seluk iha  Munisípiu 12 inklui RAEOA,” dehan Diretora Institutu Nasionál Saúde (INS), Celia Gusmão, iha ninia diskursu bainhira lansa programa ne’e iha salaun INS Comoro Dili.

”Objetivu prinsipál mak atu hadi’a liu oinsá mak koidadu saúde primáriu ne’e atu fó servisu ne’ebé mak diakliu ba ita-nia populasaun,” tenik tan.

Iha biban hanesan Diretór ONG Maluk Timor, Jeremy Beckett, hateten sira-nia organizasaun fornese treinamentu  ba INS no Ministériu Saúde kona-ba moras hada’et sira iha Timor-Leste.

Maibé durante pandemia globál surtu COVID-19 iha TL, nia dehan fó mós formasaun kona-ba moras coronavirus ba profisionál saúde sira.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here