Profesionál Saúde sira halo kampaña nasionál fase liman hodi prevene surtu COVID-19, iha areadór HNGV, kinta (14/05). Imajen Tatoli/António Gonçalves

DILI, 20 jullu 2010 (TATOLI) – Ministra Saúde, Odete Maria Freitas Belo, hateten atribuisaun suplementu remuneratóriu ba pesoál saúde ne’ebé konsidera liña frente durante situasaun COVID-19 iha Timor-Leste, bazeia ba oráriu serbisu ne’ebé define ona.

Ministra Odete Belo konsidera kestaun atribuisaun ne’e tékniku tebes tanba pagamentu ne’ebé Ministériu Saúde (MS) halo la tuir kategoria profisionál saúde sira nian, maibé tuir oráriu no ordén serbisu nian.

Governante ne’e orienta ona rekursu umanu MS atu verifika filafali dadus nune’e bele selu tuir kategoria ne’ebé hatúr ona iha Rezolusaun Governu.

“Ita selu bazeia ba oráriu traballu sira ne’ebé mak atualmente iha tiha ona no ita la modifika. Ida-ne’e mak ami ho profisionál saúde sira sei iha diferénsia ideia. Foin lalais enkontru ko’alia klaru ona ho sira (red-profisionál saúde) katak se karik iha pesoál saúde ruma ninia kritéria ne’ebé tuir loloos nia monu ba kritéria A, maibé koloka kritéria seluk,” relata Ministra Odete hafoin ramata enkontru ho Primeiru-Ministru, Taur Matan Ruak iha Palásiu Governu, segunda ne’e.

Nune’e, nia husu ba tékniku sira labele hein no tenke halo verifikasaun lalais tuir kategoria, ne’ebé mak sala haruka filafali ba rekursu umanu atu halo justifikasaun hodi diretór sira asina no bele halo pagamentu sira iha loron ne’ebé mak lakon ne’e.

Maibe nia dehan profisionál saúde sira ejize Governu selu sira durante serbisu loron 60, enkuantu tuir Rezolusaun Governu la fó dalan tanba pagamentu bazeia ba ordén no oráriu serbisu nian.

“Ami diskute ona, balun hakarak atu selu ba sira-nia loron 60 maibé iha Rezolusaun Governu nian ne’ebé ko’alia kona-ba loron efetivu ne’ebé mak profisionál saúde sira hala’o ninia serbisu ba loron ne’e rasik, liga mós ho sira-nia ordén traballu hosi sira-nia superiór no liga mós ho oráriu traballu,” esklarese Ministra Odete.

Eis Diretora Ezekutivu Servisu Autónomu Medikamentu Ekipamentu Saúde (SAMES) ne’e subliña, problema hirak ne’e implika ba orsamentu ne’ebé prevee ona tanba tenke haree serbisu balun ne’ebé MS la konsege halo ezekusaun ba osan COVID-19 nian iha atividade fulan-tolu nia-laran.

“Ita bele husu Ministériu Finansa atubele haree asuntu pesoál saúde sira-nia,” Odete akresenta.

Governante ne’e apela ba pesoál saúde sira ne’ebé simu sira-nia direitu suplementu remuneratóriu la kompletu, tenke hatama pedidu reklamasaun ba MS nune’e bele prosesu tanba bainhira laiha reklamasaun maka MS labele prosesa.

MS simu ona pedidu pagamentu suplementu remuneratóriu husi ajénsia SAMES no institutu públiku, tuir kategoria oráriu no ordén serbisu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here