Embaixadór Uniaun Europeia ba Timor-Leste, Andrew Jacobs. Imajen/Florêncio Miranda Ximenes

DILI, 17 Jullu 2020 (TATOLI) – Uniaun Europeia (UE) apoiu orsamentu millaun $7,6 ba Governu Timor-Leste hodi finansia atividade prinsipál tolu hanesan Jestaun Finansa Públika, Nutrisaun no Desentralizasaun.

Embaixadór UE ba Timor-Leste, Andrew Jacobs, informa ohin loron transfere ona orsamentu ne’e ba konta tezouru Governu Timor-Leste, hanesan kontinuasaun hosi apoiu orsamentu iha programa tolu iha Timor-Leste.

“Ohin loron Uniaun Europeia transfere orsamentu millaun $7,6 ba konta tezouru Governu Timor-Leste, ne’ebé apoia orsamentál ne’e sei hola parte iha Orsamentu Jerál Estadu (OJE) 2020 Timor-Leste nian,” tenik Embaixadór UE ba Agência Tatoli, iha ninia knaar fatin, Palm Bussiness Center, Surikmas Fatumeta, sesta ne’e.

Tuir Andrew Jacobs, Governu mak sei deside utilizasaun orsamentu ne’e no sei hetan supervizaun husi Parlamentu Nasionál inklui Tribunál Kámara Konta.

“Orsamentu ne’e atu apoia reforma sira hosi autoridade Timor-Leste nian ba área xafe tolu, ne’ebé apoiu orsamentu kada tinan husi Uniaun Europeia depende ba prestasaun iha implementasaun no estratejia hosi Governu. Bainhira prestasaun di’ak, pagamentu sei barak liután no maibé bainhira progresu ladún di’ak maka pagamentu mós sei menus,” nia subliña.

UE rasik la deside utilizasaun orsamentu no planu estratéjiku iha área xave ne’ebé define ona, maibé Ministériu Finansa, Ministru Saúde no Ministériu Administrasaun Estatál maka iha kompeténsia halo prosesu negosiasaun hodi define estratéjia no utilizasaun fundu ne’e.

“Ami-nia esperansa katak fundu ne’e sei ajuda aselera dezenvolvimentu sustentável iha Timor-Leste, liuliu dezenvolvimentu ekonomia, servisu públiku,  hasa’e subsisténsia ba sidadaun sira hotu atu benefisia ba timor-oan tomak,” nia realsa.

Fundu ne’e, UE sei la halo suprevizaun no kotrolu tanba tama ona iha OJE, tanba ne’e Governu maka sei deside nia estratejia.

Orsamentu ne’e sei aloka millaun $4 ba Jestaun Finansa Públika, millaun $2,2 ba ba Nutrisaun no millaun $1,4 ba Desentralizasaun.

“Ami kontente fó kontribuisaun ho montante millaun $7,6 ba Orsamentu Estadu Timor-Leste tinan ne’e. Ami mós rekoñese katak dezafíu signifikante sira sei eziste liuliu ligadu ho pandemia COVID-19, maibé kontente atu apoia reforma iha área xafe tolu ne’e,” nia afirma.

UE nafatin hatudu kompromisu atu kontinua apoia Timor-Leste iha área pontesiál sira hodi dezenvolve Timor-Leste.

Iha 23 jullu, reprezentante nível ltu sira hosi Ministériu Negósiu Estanjeiru no Kooperasaun, Ministériu Finansa, Ministériu Saúde no Ministériu  Administrasaun Estatál sei hala’o diálogu polítika ho reprezentante UE atubele halo revizaun ba ajenda reforma, progresu no dezafíu sira iha setór tolu liga ba apoiu orsamentu.

Diálogu ne’e, sei partisipa mós hosi reprezentante Sosidade Sivíl iha Timor-Leste inklui Parseiru Dezenvolvimentu sira.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here