Ministru ba Asuntus Kombatentes Libertasaun Nasionál, Júlio Sarmento da Costa "Meta Mali". Imajen/Egas Cristovão

DILI, 14 jullu 2020 (TATOLI)–Ministru Asuntu Kombatente Libertasaun Nasionál (MAKLN), Júlio da Costa ‘Meta Malik’, hateten lider nasionál Xanana Gusmão, Taur Matan Ruak, Lú Olo, Ramos Horta no Marí Alkatiri, sira iha obrigasaun morál no nu’udar aman ba nasaun presiza nafatin sira-nia kontribuisaun ba rai ida-ne’e, la signifika tenke asume knaar ruma.

Nia hatutan, nu’udar aman ba nasaun, lider hirak ne’e tenke iha responsabilidade hodi rai hela buat di’ak ba jerasaun foun sira liuliu ba jerasaun futuru sira.

“Sira atu asume ka la asume knaar mós, sira kontinua kontribui nafatin no fó hanoin ba malu, molok sira-nia iis kotu husik rai ida-ne’e ba jerasaun foun sira. Tanba ne’e mak la presiza maun sira tenke iha responsabilidade mak hala’o ne’e lae. Maibé iha responsabilidade ida nu’udar aman no nu’udar maun tenke rai buat di’ak ba jerasaun foun iha futuru,” dehan Ministru Asuntu Kombatente Libertasaun Nasionál (MAKLN), Júlio da Costa ‘Meta Malik’, ba jornalista sira iha Palásiu Governu, tersa ne’e. 

Nia hatutan, Xanana Gusmão mós iha nia limitasaun forsa hodi hala’o servisu entaun nia bele rezigna-aan.

“Ha’u ko’alia nu’udar pesoál, la’ós ministru. Katak, ha’u la haree hosi aspetu polítiku maibé Maun Boot Xanana nu’udar umanu iha nia limitasaun forsa. Maibé, bainhira hakarak rezigna-aan katak nia hanoin ona iha jerasaun foun ne’ebé mak bele ona,” nia dehan. 

Governante ne’e haktuir, Xanana rezigna-aan la signifika atu lakohi ko’alia maibé rezigna-aan atu kontinua kontribui no sura hamutuk ho katuas sira, atu uitoan ka barak, sira kontribui ona atu buat hotu la’o di’ak.

Loos tanba assume responsabilidade bele rezolve problema maibé ho sira-nia tulun no hasoru malu hodi kontribui ba malu no fó hanoin ba malu, ida-ne’e mós kontribui ona ba prosesu. La signifika tenke asume mak foin halo, sira iha responsabilidade morál atu kontribui nafatin,” nia hateten.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here