Juiz Administradór TDD, Afonso Carmona. Imajen/Domingos Piedade

DILI, 14 jullu 2020 (TATOLI) – Atu aselera prosesu julgamentu ba kazu sivíl no kazu krime sira ne’ebé pendente iha Tribunál Distritál Dili (TDD), Juiz Administradór TDD Afonso Carmona, halo ona distribuisaun prosesu ba juiz titular sira atu bele asegura.

“Hanesan juis administradór agora halo ona distribuisaun prosesu ba juiz sira tuir regra prosesuál realiza julgamentu no asegura despaxu sira tun hodi notifika parte sira,” informa Afonso Carmona, ohin, hodi responde Agência Tatoli iha nia servisu fatin, Dili.

Daudaun ne’e, Tribunál Distritál Dili rejista kazu pendente ho kategoria kazu krime hamutuk 2023 no kazu sivíl hamutuk 1013.

Afonso Carmona informa mós katak, durante fulan tolu implementasaun estadu emerjénsia afeta mós tarefa servisu Tribunál nian hodi dudu prosesu julgamentu iha Tribunál la’o ho efisiénsia no efikásia.

TDD rasik mós halo ona dilijénsia hodi notifika parte sira hanesan vítima, suspeitu ho sasin sira tuir loron ne’ebé marka nune’e bele tuir julgamentu hodi presta deklarasaun.

Daudaun ne’e juiz hamutuk na’in-14 kompostu hosi  na’in-10 koloka hodi foku ba kazu krime no na’in-haat (4) koloka ba iha kazu sivíl hodi hala’o sira-nia servisu ho independénsia no imparsiál atu fasilita asesu justisa hanesan ba ema hotu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here