Embaixadór Xina ba Timor-Leste, Xiao Jiaguo entrega máskara ba Sekretáriu Estadu Komunikasaun Sosiál, Merício Juvinal dos Reis ‘Akara’, tersa (14/07), iha Embaixada Xina Farol. Imajen/Natalino Costa

DILI, 14 jullu 2020 (TATOLI) – Embaixada Xina iha Timor-Leste apoia máskara kaixa tolu, ho totál máskara hamutuk 2.000 ba Sekretaria Estadu Komunikasaun Sosiál (SEKOMS) inklui mídia Estadu hanesan Rádiu Televizaun Timor-Leste, Empreza Públika (RTTL,ep) no Agência Tatoli.

Sekretáriu Estadu Komunikasaun Sosiál, Merício Juvinal dos Reis ‘Akara’ hateten apoiu ne’e hodi halo protesaun bainhira hala’o knaar no nafatin halo prevensaun ba surtu COVID-19.

“Tanba Ita-nia situasaun iha ámbitu luta hasoru COVID-19 sei kontinua, entaun atu halo prevensaun maka Señor Embaixadór apoia RTTL, Agência Tatoli no mós Gabinete SEKOMS hodi uza hala’o servisu,” tenik Sekretáriu Estadu Akara iha Embaixada Xina iha Timor-Leste, iha Farol, tersa ne’e.

Tanba ne’e reprezenta VIII Governu, governante ne’e hato’o apresiasaun ba apoiu ne’e.

“Ita apresia ajuda hirak ne’e, reprezenta VIII Governu Konstitusionál hanesan membru Governu fó apresiasaun boot ba Señor Embaixadór ne’ebé maka sempre atu hamriik iha ita-nia sorin iha kualkér situasaun liuliu hasoru COVID-19, Señor Embaixadór sempre prontu,” nia subliña.

Nia nota, kuaze ajuda direta ba Timor-Leste hodi kombate COVID-19 maihusi Governu Xina, tanba ne’e Governu Timor-Leste hato’o obrigadu ba Governu Xina.

Iha sorin seluk, Embaixadór Xina ba Timor-Leste, Xiao Jiaguo hateten ajudu ne’e hodi nafatin prevene-an husi moras COVID-19.

“Dezde COVID-19 mosu, Governu Xina kompometidu tebes hamriik hamutuk ho Governu Timor-Leste hodi fó resposta. Ami iha kooperasaun di’ak ho Señor Sekretáriu Estadu Komunikasaun Sosiál, tanba ne’e ohin ita hakarak fó apoiu máskara ba mídia sira, liuliu iha setór komunikasaun sosiál nian,” tenik diplomata ne’e.

Biban ne’e, nia parte apresia ho medida ne’ebé Estadu Timor-Leste foti hodi luta kontra surtu COVID-19 tanba hafoin kazu konfirmadu rekupera hotu ona, daudaun ne’e seidauk iha kazu ativu foun.

“Ha’u kontete tebes haree iha ona progresu di’ak kona-ba kontrolu ba COVID-19 iha Timor-Leste,” nia subliña.

Maski nune’e, nia nafatin apela atu komunidade kontinua nafatin halo vijilánsia saúde tanba COVID-19 bele iha posibilidade mosu iha vaga daruak.

Seremónia entrega ne’e partisipa mós husi Prezidente RTTL, Francisco Gari, Prezidente Agência Tatoli, José Costa inklui ekipa husi SEKOMS.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here