Antigu Ospitál Indonézia, Wirahusada, Lahane. Imajen tatoli/António Gonçalves

DILI,13 jullu 2020 (TATOLI)-Na’in ba Kompañia HEDGE Contraction Lda, Francisco Moniz, relata prosesu reabilitasaun  ba Ospitál Antigu Lahane Dili daudaun ne’e atinje ona porsentu 30 (%).

Kompañia komesa ezekuta ona projetu ne’e iha loron 17 fulan-juñu liubá no konsege taka ona kalen no seluk tan.

“Agora daudaun iha item balun mak seidauk klaru no presiza halo diskusaun ho Ministériu Saúde mak ezemplu item halo drainazen,  sistema bee no sistema oksijéniu no  sistema kramik,” dehan nia ba Tatoli via telefone, ohin.

Tuir kontratu ne’ebé maka Ministériu Saúde estabelese ho Kompañia HEDGE katak projetu ne’e implementa ho durasaun fulan tolu hahú juñu no ramata iha Outobru 2020 ho orsamentu ba obra ne’e hamutuk millaun $ 4.51.

”Ministériu Saúde kontratu ami ne’e fulan-tolu  atu halo reabilitasaun hahú husi fulan-juñu ramata iha setembru  ka outubru no  haree ba item sira se item kompletu ami bele ramata,”nia hateten.

Iha parte seluk Diretór Aprovizionamentu Ministériu Saúde, Bernadino da silva, hateten Ministériu Saúde sei uza ospitál Lahane Dili sai fatin izolamentu ba pasiente surtu COVID-19  durante pandemia globál ne’e.

Aleinde ne’e, tuir planu Governu nian ba futuru sei uza Ospitál Antigu Lahane sai Ospitál Militár.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here