Komandante Polísia Munisípiu Dili, Superintendente Xefe Hendrique da Costa. Imajen/Eugénio Pereira

DILI, 13 jullu 2020 (TATOLI)-Konfrontu fíziku akompaña ho tuda malu ho fatuk entre grupu juventude balun iha area Fatu-ahi, Suku Camea, Postu Administrativu Cristo Rei, Munisípiu Dili rezulta komunidade nia uma tolu estragu.

Konfrontu ne’ebé akontese iha sábadu too domingu  madrugada (11-12/07), autoridade polísia halo kedas atuasaun hodi akalma situasaun no konsege kaptura suspeitu na’in-neen (6) hodi submete ba investigasaun no detein iha sala detensaun polísia nian.

Komandante Polísia Munisípiu Dili, Superintendente Xefe Hendrique da Costa, ohin, informa,  suspeitu na’in-neen detein hela iha Polisia Eskuadra Becora hodi submete ba prosesu investigasaun.

Kona-ba naran inisiál hosi juventude mane na’in-neen ne’ebé kaptura, parte polisia seidauk bele fó sai tanba sei hala’o hela investigasaun kle’an.

Nia dehan, kazu ne’e akontese, tanba iha juventude ida hala’o hela ninia atividade atu ba hili ai iha foho leten, nune’e joven ne’e tenta la’o iha grupu juventude balun ne’ebé halo hela atividade treinu maka baku uluk joven ne’e, ikus mai grupu joven balun la simu hodi halo ataka ba malu.

“Konfrontu ne’e hahú kedas iha sábadu da’et too domingu dadeer,” hateten Superintendente Xefe Hendrique da Costa,  akompaña hosi Segundu Komandante, Superintendente Asistente Xefe Euclides Belo, liuhosi konferénsia imprensa iha Komandu Polísia Dili.

Hafoin kaptura suspeitu na’in-neen, PNTL halo mós apreensaun ba sasán kontra bandu hanesan, diman, katana no ai-pedasuk.

Komandante Henrique hatutan, PNTL kontinua halo nafatin patrullamentu hodi akalma sitasaun no evita konfrontasaun akontese tan.

Simu Mandadu Detensaun

Iha parte seluk, Komandu Polisia Munisípiu Dili simu ona mandadu detesaun husi Ministériu Públiku sei kaptura suspeitu ho inisiál FP ne’ebé deskonfia autór prinsipál ba kazu fó oan vítima feto ida ne’ebé tara aan too mate iha área Liquintai-Lahane Osidentál, Dili.

Tuir relatóriu investigasaun hosi Polísia Investigasaun Kriminál Munisípiu Dili nota vítima mate iha sábadu (4/07/2020) a, tanba sofre trauma psikolojia, tanba suspeitu ne’ebé halo vítima isin rua lakohi responsabiliza.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here