Motor lubun ne’ebé Polísia Unidade Tránzitu halo apreensaun tanba viola lei tránzitu to’o agora na’in la ba reklama no barak ferrujen hotu ona. Tanba ne’e PGR koopera ho PNTL atu halo leilaun ba públiku. Imajen Tatoli/Eugénio Pereira

DILI, 13 jullu 2020 (TATOLI)- Komandu Polísia Munisípiu Dili (KMD) liuhosi Seksaun Tránzitu hato’o ona pedidu ba Ministériu Públiku (MP) no Tribunál Distritál Dili (TDD) atu fó autorizasaun hodi halo leilaun ba motorizada hamutuk 451 ne’ebé ninia prosesu  remata ona no na’in la ba foti.

Motorizada hamutuk 450 ne’e nu’udar sasán evidénsia ba kazu krime grave balun  no asidente tráfegu sira ne’ebé polísia sira halo apreensaun hahú hosi tinan 2002 too agora ninia prosesu ba kazu sira rezolve hotu ona.

Motór  hirak ne’e rai butuk  iha arredores Polísia Munisípiu Dili too agora na’in ba motorizada la ba prosesu ka foti no la ba halo reklamasaun.

Komandante Polísia Munisípiu Dili, Superintendente Xefe Hendrique da Costa, deklara, iha semana kotuk nia parte ho Segundu Komandante Munisípiu Dili, Euclides Belo ba hala’o ona enkontru ho Prokuradór Distritál Dili, Jacinto Babo hodi haree prosesu ne’e.

“Ita servisu hamutuk ho Ministériu Públiku no Tribunál Distritál Dili nu’udar na’in ba prosesu atu haree no foti desizaun,” dehan Superintendente Xefe Henrique ba jornalista, ohin, iha Komandu Polísia Dili.

Iha parte seluk, Komandu PNTL liuhosi Seksaun Tránzitu Dili mós sei kontinua halo operasaun loro-loron kontrola movimentu transporte sira ne’ebé para arbiru iha estrada públiku sei aplikasaun sansaun multa ba Estadu.

PNTL mós sei halo operasaun maka’as iha Hera ba too Metinaro nian ne’ebé PNTL identifika kuaze loroloron área ne’ebé sidadaun sira halo movimentu ho transporte la uza kapasete inklui lori karreta no motór halai arbiru la kumpre regra sinais tránzitu nian.

Jornalista : Eugénio Pereira

Editór       : Francisco Simões

1 KOMENTÁRIU

  1. HAU HANOIN SASAN NEBE PRENDE HUSI POLISIA BA EMA MONENTU LORI VEIKULUS REFERE, BELUM TENTU NIA NA’IN MAK EMA REFERE. DALARUMA MOTOR NA’UK KARIK.
    LOLOS NE PARTE KOMPETENSIA HALO PAJINA ESPESIFIKU IDA IHA FB. PARA PUBLIKA SAI BA PUBLIKU, KARIK VEIKULUS NE SASAN NAUK, ENTAUN EMA BELE HELA IHA FATIN DOOK MOS BELE HATENE NIA SASAN RASIK NO LORI NIA DOKUMENTUS BA FOTI FALI. SE REFERE DEIT BA EMA NEBE MAK DURANTE NAIN HIRA FOTI SASAN HUSI SIRA NIA LIMAN RASIK. HAU HANOIN NE SEI LA GARANTE DIAK KATAK, NA’IN MAK EMA NE DUNIK NO NIA LAKOHI FOTI NIA SASAN. TENGKI IHA HANOIN SELUK RUMA. KATAK DALARUMA SASAN NAOK.

    SE BELE MONTA PAJINA FOUN IDA IHA FB PARA PUBLIKA SAI NOKOR MESIN HO NOMOR RANGKA BA PUBLIKU. PARA EMA SIRA SASAN LAKON NE BELE HATENE.

HAKEREK NO HATÁN

Please enter your comment!
Please enter your name here