Traballadór sira habai hela kafé iha sentru habai kafé CCT nian iha Railaco, kinta (09/07). Imajen Tatoli/António Gonçalves

ERMERA, 11 jullu 2020 (TATOLI) – Relasiona ho implementasaun Estadu Emerjénsia, atividade negósiu balun mak la la’o, maibé Kooperativa Kafé Timor (CCT, sigla portugés) ne’ebé durante ne’e sosa produtu agrikultór, liuliu kafé, simu ezijénsia komunidade agrikultór hodi sosa kafé.

Komunidade agrikultór sira argumenta bainhira CCT la sosa sira-nia produtu maka sira sei labele sustenta sira-nia família tanba laiha osan, tanba fonte úniku populasaun Ermera maka husi kafé.

Ralasiona ho ezijénsia komunidade sira nian maka CCT husu autorizasaun ba Ministériu Agrikultura no Peska (MAP) hodi hasai despasu hodi autoriza kooperativa ne’e sosa kafé iha ámbitu Estadu Emerjénsia no prevensaun COVID-19.

Koordenadór Fábrika Prosesamentu Kafé no Responsável CCT-Railaco, José Almeida dos Santos, haktuir antes funsionáriu atu sosa kafé, sira halo uluk sensibilizasaun ba medida prevensaun COVID-19 ba komunidade sira nune’e bele kumpre regulamentu prevensaun ba moras refere.

“Antes sosa kafé, ami halo uluk sensibilizasaun kona-ba prevensaun COVID-19, tuir regra ne’e iha maiu 2020 labele sosa kafé, maibé ami haree produsaun kafé hanesan produsaun primadona ida iha Timór no agrikultór sira hato’o sujestaun katak CCT la sosa sira-nia kafé maka sira labele hetan osan hodi sustenta família, tanba sira ninia ekonomia família bazeia de’it ba kafé. Entaun ami hahú sosa iha 28 maiu to’o agora buat hotu la’o ho di’ak,” relata Responsável CCT-Railaco iha ninia knaar fatin, Fábrika Prosesamentu Kafé Railaco, Munisípiu Ermera, sexta (10/07).

Koordenadór Fábrika Prosesamentu Kafé no Responsável CCT-Railaco, José Almeida dos Santos. Imajen Tatoli/António Gonçalves

To’o ohin loron, CCT konsege sosa ona kafé husi agrikultór sira hamutuk tonelada 2.016 no kilograma 510.

Kafé ne’ebé CCT sosa maihusi Postu Administrativu Railaco hamutuk kilograma 722.245, kafé ho tipu Hotino kilograma 259.970, Aifu kilograma 55.685, Hatulia A kilograma 203.095, Hatulia B kilograma 136.645.

Enkuantu, CCT mós sosa kafé iha postu kafé Liquiçá ho kilograma 74.085, Leorema kilograma 295.975, no Aileu kilograma 268.810.

Traballadór hamos hela kafé iha sentru prosesamentu kafé CCT nian iha Railaco, kinta (09/07). Imajen Tatoli/António Gonçalves

“CCT lakohi husik produtu komunidade nian monu le’et ka rai de’it to’o dodok maka CCT husu lisensa ba Ministériu Agrikultura no Peska hodi hatún despasu ida ba CCT no mós husu autorizasaun seguransa husi Komandu Polísia nível nasionál no munisipál hodi nune’e bele fasilita CCT sosa kafé iha ámbitu Estadu Emerjénsia ligadu ho surtu COVID-19,” nia subliña.

Tuir responsável ne’e katak iha tinan 2020, populasaun Ermera fa’an kafé sedu tebes tanba seidauk to’o fulan rua CCT sosa ona kafé tonelada 2.016, kompara tinan kotuk hahú iha loron 30 abríl to’o 10 agustu sosa de’it tonelada 2.410.

Traballadór sira iha sentru prosesiamentu kafe iha Railaco tula kafé ne’ebé dulas moos ona ba kareta hodi lori ba habai iha sentru habai kafé CCTL nia iha Tibar, kinta (09/07). Imajen Tatoli/António Gonçalves

Kona-ba folin kada kilograma, Dirijente ne’e klarifika katak folin ne’ebé sira estabelese sira haruka uluk karta ida ba MAP hodi fó autorizasaun maka CCT implementa tuir presu kada kilograma sentavu 32.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here