Deputada CNRT, Carmelita Caetano Moniz. Imajen/dok.TATOLI

DILI, 10 jullu 2020 (TATOLI)—Projetu Lei Medida Prevensaun no Kombate Korrupsaun (MPCC-sigla portugés) hetan ona aprovasaun hosi Komisaun A (Justisa no Konstitusionál) tanba hetan konsensu hosi forsa polítiku iha Parlamentu Nasionál (PN).

Membru Komisaun  A (Justisa no Konstitusionál), Deputada Carmelita Caetano Moniz, hateten razaun altera Lei Antí Corrupção (LAC) ba Medida Prevensaun no Kombate Korrupsaun (MPCC-sigla portugés) tanba uluk projetu lei orijinál laiha medida prevensaun no deklarasaun bens maibé iha mak medida reprensaun kriminál de’it.

“Ha’u fiar katak sei iha votu maioria sei fó votu favorável ba lejizlasaun ida-ne’e tanba lei ida-ne’e ema hotu-hotu fó opiniaun, ne’ebé la’ós deputadu ida ka rua nia opiniaun. Lejizlasaun ne’e hetan konsensu hosi forsa polítika hotu-hotu iha Parlamentu Nasionál”, Deputada Carmelita Caetano Moniz, informa ba jornalista sira, iha resintu Parlamentu Nasionál, sesta ne’e.

Deputada Bankada CNRT ne’e haktuir, Komisaun A halo audiénsia públika no halo análize ba projetu lei ne’e hodi hamosu textu subtitutivu ba Projetu Lei Medida Prevensaun no Kombate Korrupsaun.

“Ami hamosu textu substitutivu ida ne’ebé ke sai tiha artigu 47 tanba proposta orijinál ne’e artigu 26 de’it, ami tau medida preventiva kala artigu 2 de’it hanesan ne’e no plenária aprova textu subtitutivu maibé deputadu hotu-hotu fó hanoin atu iha medida preventivu. Textu substitutiveu ne’e ami ba halo tán konsultasaun públika liuhosi semináriu ida,” nia dehan.

Lejizlasaun ne’e Komisaun A halo konsultasaun públika ho sosiedade sivíl, entidade hotu-hotu no jornalista sira fó hanoin hafoin konsidera medida preventiva ne’ebé importante tebes mak deklarasaun bens no rendimentu.

Iha momentu ne’ebá, Komisaun A lideradu Deputada Caetano Caetano Moniz konsidera opiniaun hirak ne’e hodi tau medida preventiva. Hosi opiniaun hirak ne’e Komisaun A deside ba buka referénsia iha rai balun ne’ebé ke iha medida preventiva kapaas.

Momentu ne’ebá, Deputada Carmelita ne’ebé lidera Komisaun A ne’e eskolla atu ba Brazil no Arjentina tanba nasaun rua ne’e mak implementa medida preventiva no deklarasaun bens di’ak tebes no tuir istória katak medida preventiva no deklarasaun bens ne’e mai hosi Arjentina mak hahú uluk no sira-nia implementasaun kapaas tebes.

“Só ke momentu ne’ebá ha’u mak kaer hela Komisaun A maibé Komisaun A nia osan lato’o entaun buka de’it Ázia laran ne’ebé halo implementasaun di’ak, implementasaun di’ak iha Ázia ne’e mak Macau. Ami ba iha Macau no ami hetan buat balun ne’ebé di’ak ita bele foti no ami tau duni iha ita-nia lejizlasaun ida-ne’e, ne’e mak ami pending tiha diskusaun ne’e,” nia dehan.

Nia hateten, medida ita uluk ne’e Komisaun A aprova de’it to’o artigu 22 depois pending tiha durante tinan ida-resin hodi haree lai medida preventiva ne’e, ne’ebé ke hamosu tán medida preventiva ne’e 70-resin nune’e haree didi’ak medida preventiva ida-ne’ebé ke di’ak reflete realidade no kultura Timor nian.

Ho ida ne’e mak, Komisaun A no instituisaun relevante  hala’o disksaun durante semana tolu nia laran hodi halo aprovasaun ba medida preventiva no medida reprensiva, to’o ikus tenke muda duni ninia títulu tanba tau ona medida preventiva no medida kriminál ka reprensivu sira.

“Entaun ita tenke muda katak medida prevensaun no kombate korrupsaun tanba rua hotu hamutuk tiha ona, medida preventiva no medida kriminál hamutuk de’it, ne’e mak sai tiha hosi projetu lei inisiál loloos hosi deputadu sira hamutuk artigu 26 no ami halo análize sai artigu 47. To’o ikus liu lejizlasaun ida-ne’e sai artigu hamutuk 120,” Membru Komisaun A ne’e esplika.

Jornalista : Evaristo Soares Martins  

Editór       :  Cancio Ximenes

HAKEREK NO HATÁN

Please enter your comment!
Please enter your name here