Ilustrasaun kona-ba prevensaun TBC

DILI, 10 jullu 2020 (TATOLI)-Governu liuhosi Ministériu Saúde ho Organizasaun Mundiál Saúde (OMS), sesta ne’e lansa ona planu estratéjiku programa tubercoluse nasionál 2020-2024.

Vise Ministru Saúde, Bonifácio Maucoli dos Reis ho Reprezentante OMS Rajesh Pandev, lansa planu estratéjiku ne’e iha Otél Timor Dili.

”Governu konstituisonál daualu iha ona kompromisu boot ida oinsá atu hapara tubercoluse iha Timor-Leste,”dehan Vise Ministru Saúde.

Lansamentu ne’e sai referénsia ida ba ofisiál saúde sira ne’ebé mak destakadu iha Munisípiu liliu involve autoridade lokál no komunidade atu hapara transmisaun TBC iha territóriu TL.

Nia dehan Governu ho Ajénsia Internasionál iha kompromisu  boot hodi  servisu hamutuk ho autoridade lokál atu oinsa redúz kazu TBC iha Timor-Leste.

Fundo Globál mak durante ne’e sempre apoiu Governu hodi prevensaun ba moras Tubercoluse.

“Profisionál saúde sira oinsá atu detesaun sedu ba kazu ida ne’e depois  tratamentu mós sedu no tratamentu ida ne’e mós labele kotu-kotu entaun kontinua tratamentu intensivu to’o família sira mós tratamentu preventivu ida ne’e mak esensiál tebes,”katak Governante.

Tuir dadus hatudu katak taxa insidensia tubercoluse iha Timor-Leste mak 498/100.000 no taxa ema mate 100/100.000 populasaun. Númeru ne’e konsidera aas liu iha Rejiaun Sudeste Aziátiku.

Husi taxa insidensia ne’e signifika kada loron ema na’in tolu to’o haat mak mate tanba moras TBC.

“Moras tubercoluse iha Timor-Leste peskiza mós hatudu katak kuaze tinan barak nia laran besik 30% to’o 40% mak la konsege deteta no sei kontinua hada’et ba komunidade tanba multifaktorál sira,” dehan Governante.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here