Lamsamentu sistema Sistema Implementasaun Rekoñesimentu Abilidade Anteriór, iha salaun ETDA, Fatuhada, sesta (10/07). Imajen/Mídia-MKAE

DILI, 10 jullu 2020 (TATOLI) – Ajénsia Dezenvolvimentu Timor-Leste (ETDA, sigla inglés) halo lansamentu ofisiál ba Sistema “Implementasaun Rekoñesimentu Abilidade Anteriór” atu dignifika traballadór sira-nia serbisu liuhosi avaliasaun espriénsia.

Diretór ETDA, Januário Neto Mok, hateten objetivu husi sistema ne’e atu halo avalisaun esperiénsia servisu liuliu ba abilidade traballadór  sira-nian nune’e bele dezenvolve di’ak liu atu ba futuru bele kompete iha merkadu traballu ho di’ak.

“Sistema ne’e importante tebes no sai indikadór xave atu avalia esperiénsia servisu husi traballadór sira, atu nune’e bele kompete ho dignu iha kampu traballu,” tenik Dirijente liuhosi diskursu iha seremónia lansamentu sistema, iha salaun ETDA, sesta ne’e.

Nia dehan, atu halo avalisaun ba traballadór sira nia abilidade ETDA iha fasilidade garantidu.

Bazeia ba peskiza katak bainhira fó avaliasaun no rekoñesimentu ba ema ida-idak nia dezempeñu, sei fó rendimentu di’ak ba empregadór sira no mós ba sosiadade.

“Edukasaun sai hanesan baze fundamentál ba kresimentu produtividade maibé depende ba forsa traballu, tanba ne’e Estadu presiza investe barak liu ba edukasaun formál no informál, nune’e bele kapasita joven sira no hadi’a nível kualifikasaun sai hanesan rekezitu ida atu iha futuru bele kompete iha merkadu traballu,” nia subliña.

Iha fatin hanesan, Diretór Instituto Nacional Desenvolvimentu de Mão de Obra (INDMO), Isabel Fernades de Lima iha nia intervensaun hateten kritériu selesaun iha institutu formasaun ida atu hetan sertifikasaun husi INDMO rasik mai husi avaliasaun ne’ebé maka institutu ne’e rasik halo.

“ETDA hanesan sentru dahuluk ba sistena implementasaun rekoñesimentu abilidade anteriór, ne’ebé nu’udar desizaun koletiva maihusi INDMO, Sekretaria Estadu Formasaun Profisionál no Empregu (SEFOPE) no instituisaun relevante sira,” nia akresenta.

Nune’e mós, Ministru Kordenadór Asuntu Ekonómiku, Joaquim Amaral, dehan lori VIII Governu nia naran, nia parte felisita ETDA tanba sai nu’udar sentru formasaun ne’ebé bele akomula joven sira iha área formasaun oin-oin.

“Ha’u lori Governu nia naran atu kongratula esforsu ne’ebé ETDA daudaun ne’e halo hodi forma joven sira iha área oin-oin, liuliu ba kapasitasaun nune’e ba futuru bele iha rekursu umanu ne’ebé kualifikadu. Tanba ne’e Governu sei fó nafatin apoiu ba inisiatiativa sira ne’e,” Joaquim subliña.

Haree ba Timor-Leste esforsu hela atu adere ba Asosiasaun Nasaun iha Sudeste Aziátiku (ASEAN, sigla inglés) maka iha aspeitu ne’e sei iha sirkulasaun ekonómia no ema iha kampu traballu.

“Ho sistena implementasaun rekoñesimentu abilidade anteriór bele avalia kapasidade no abilidade traballadór timor-oan sira iha área oin-oin atubele prepara sira di’ak liután,” nia akresenta.

Governante ne’e husu ba INDMO atu halo kontrolu ba institutu formasaun sira iha Timor-Leste atu fó kapasitasaun di’ak no kualidade atubele kompete iha profisaun tanba mundu agora presiza profisaun maka importante.

Iha seremonia lansamentu sistema ne’e, parte INDMO mós atribui serfikadu rekoñesimentu ba ETDA, ba programa sistema implementasaun rekoñesimentu abilidade anteriór rasik.

Seremónia lansamentu ba Sistema Implementasaun Rekoñesimentu Abilidade Anteriór, hetan partisipasaun husi Ministru Joaqim Amaral, Serkretáriu Estadu Formasaun Profisionál no Empregu, Alarico do Rosário Reprezentante Embaixadór Austrália, Adjuntu Komadante Akademia Polísia Nasionál Timor-Leste (PNTL), inklui diretór husi ajéndia autónomu sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here