Hare iha Atabae. Imajen Tatoli/António Gonçalves

DILI, 09 jullu 2020 (TATOLI) – Diretór Jerál Ministériu Agrikultura no Peska (MAP), Maria Odete do Ceo Guterres, hateten tuir previzaun MAP nian, produsaun hare tinan ne’e hamutuk tonelada 78.000.

“Tuir previzaun Ministériu Agrikultura no Peska, tinan ne’e ita bele prodúz hare to’o tonelada 78.000, ne’ebé bainhira ita konverte ba foos sei hetan tonelada 40.200 dei’t husi koilleta iha époka dahuluk, enkuantu ba époka daruak ne’e previzaun ba kada tinan la’ós pur époka,” tenik Dirijente ne’e iha edifísiu Ministériu Finansa, Aitarak-Laran, kinta ne’e.

Tuir Maria Odete, produsaun hare tinan ne’e seidauk bele kobre nesesidade konsumu nasionál.

“Ba konsumu nasionál la to’o, tanba ho populasaun ida millaun 1,3 ne’e ita presiza tonelada 11.000 ba fulan-ida nia, enkuantu ita prodúz de’it tonelada 80.000 ba fulan-ida. Signifika ita presiza importa tan tonelada 50.000 hodi bele garante konsumu nasionál ba tinan ida. Tanba ne’e maka aproveita krize surtu COVID-19 ne’e ita tenke halo reforma ba ita-nia polítika ne’e atubele hasa’e produsaun barak,” nia subliña.

Nia dehan, atu hasa’e produsaun presiza loke tan área kultivu barak liután, nune’e bele hasa’e produsaun agríkola iha rai-laran.

“Atu loke área kultivu barak no halo boot liután, ita-nia agrikultór sira tenke ativu iha utilizasaun infraestrutura hanesan irigasaun ho buat sira seluk,” nia akresenta.

Diretora Odete Maria hateten daudaun ne’e produsaun hare ba époka hahú halo ona Koilleta iha Munisipiu Manufahi no Covalima no agrikultór sira hahú kuda fali ona hare ba époka daruak.

Iha 22 maiu ne’e, Prezidente Sentru Lojíztiku Nasionál (CLN, sigla portugés), Augosto Junior Trindade hanesan reprezentante Governu, selebra kontratu ho Governu Repúblika Sosialista Vietname hodi sosa foos tonelada 30.000 resin.

Setór privadu sira mós halo ona akizisaun foos husi rai-li’ur hodi haforsa stock nasionál.

Foin lalais, foos hamutuk tonelada 2.700 ho na’in husi Timor Food, Lda, atraka iha Portu Dili.

Primeiru Vise Prezidente Autoridade Portuáriu Timor-Leste (APORTIL), José Manuel Marques, informa tan durante períodu Estadu Emerjénsia, foos hamutuk tonelada 4.150 husi rai-li’ur maka to’o Timor-Leste no nain maka setór privadu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here