Inan feton agrikultór baunilla iha Suku Leimea Sorin Balun, Postu Administrativu Hatulia, Munisípiu Ermera. Imajen Tatoli/António Gonçalves

ERMERA, 09 jullu 2020 ( TATOLI) – Agrikultór baunilla suku Leimea Sorin Balun, Postu Administrativu Hatulia, Munisípiu Ermera husu ba Governu atu define loloos folin ba kada kilograma.

Agrikultór sira konfesa iha vontade di’ak no badinas tebes kuda baunilla maibé folin mak ladún razoável no piór liután iha ámbitu pandemia COVID-19, Kooperativa Kafé Timor (CCT, sigla portugés), ne’ebé mak durante ne’e sosa baunilla hatún folin baunilla.

“Ami husu ba Governu no Parlamentu Nasionál, liuliu Komisaun D ne’ebé trata asuntu Ekonomia no Dezenvolvimentu atu bolu atensaun ba CCT ne’ebé mak sosa ami-nia baunilla durante ne’e tanba sira mai hatún folin. Ami la satizfeitu ho folin ne’ebé CCT fó ba kategoria A no B, kategoria A kada kilograma $20 no kategoria B kada kilograma $15, kompara ho tinan kotuk kada kilo $50,” hateten Portavóz Komunidade Suku Leimea Sorin Balun, Cipriano dos Santos liuhosi komferénsia imprensa iha suku Leimea Sorin Balun, Munisípiu Ermera, kinta ne’e.

Tuir informasaun ne’ebé komunidade iha suku ne’e simu husi ajente CCT nian katak sira hatún folin baunilla tanba krize surtu COVID-19.

“Ami senti triste tebes, tanba ne’e mak ami populasaun hamutuk na’in-80 ho produtu baunilla tonelada rua deside la tetu baunilla ba CCT,” nia akresenta.

Portavóz ne’e afirma, Agrikultór Baunilla no Kafé iha Suku Leimea sente triste tebes tanba sira nia moris atu sustenta família lori produtu rua ne’e de’it hodi fa’an.

“Komunidade Suku Leimea Sorin Balun iha vontade boot hasa’e produsaun baunilla, ne’ebé kada tinan hetan tonelada neen no kada tinan amenta ba bebeik, ho kreatividade ne’e hatudu katak Agrikultór baunilla badinas tebes,” nia subliña.

Tanba ne’e, sira husu ba Governu atu promove kreatividade ne’ebé sira hatudu.

“Baunilla ne’e fó vantajen boot ba ami tanba husi produtu ne’e mak bele halo mudansa ba ami, hanesan haruka ami-nia oan ba eskola, sosa motór ka karreta no sosa nesesidade bázika sira,” nia argumenta.

Sorin seluk, Xefe Suku Leimea Sorin Balun, Leonel dos Santos, preokupa mós ho folin baunilla tanba iha tinan 2018 kada kilograma ho folin $45 to’o $ 57, maibé iha tinan ne’e folin tún tebes no CCT mak sosa.

Xefe Suku Leimea Sorin Balun, Leonel dos Santos. Imajen Tatoli/António Gonçalves

“Kuda baunilla inisiativa rasik husi komunidade sira ho razaun ida katak tenke buka rasik meiu hodi bele sustenta família, enkuantu fini baunilla populasaun sira rasik mak buka”, nia dehan.

Populasaun sira organiza grupu kompostu husi ema na’in 100-resin hodi hahú dahuluk kuda fini baunilla iha rai ektare sanulu no agora iha ona ektare 260.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here