Majór Jenerál Lere Anan Timur. Imajen/António Gonçalves

DILI, 08 jullu 2020 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál   Lere Anan Timur, apela ba Timoroan no estranjeiru sira ne’ebé hakarak fila mai Timor-Leste tenke liuhosi fronteira terrestre ho dalan legál.

Lere Anan Timur hato’o  mensajen ne’e nu’udar parte ida atu sidadaun hotu bele kontribui halo prevensaun ba propagasaun surtu Coronavirus ka COVID-19 tama mai Timor-Leste.

Lere Anan Timur hateten, maske Timor-Leste oras ne’e laiha ona kazu ativu COVID-19, maibé nasaun viziñu indonézia liu-liu iha area provínsia Nusa Tengara Timur (NTT) kontinua rejista kazu ativu COVID-19 ho númeru aas. Tanba ne’e, Timoroan  presiza kumpre nafatin aplika medida prevensaun hosi Ministériu Saúde no Organizasaun Mundiál Saúde (OMS).

“Ha’u halo apelu nafatin ba sidadaun hotu atu tama hosi fronteira atu ho dalan legál  no labele liuhosi dalan ilegál hodi nune’e bele halo prevensaun ba COVID-19,’’ afirma Lere Anan Timur, ohin, ba jornalista sira hafoin enkontru regular ho Presidente Repúblika Francisco Guterres ‘’Lú Olo’’ iha Palaçio Presidente, Aitarak-Laran, Dili.

Durante sorumutuk, Lere Anan Timur, mós relata informasaun situasaun forsa armada no situasaun seguransa rai-laran iha nivel nasionál ba Prezidente Repúblika, ne’ebé tuir F-FDTL nia haree la’o hakmatek.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here