Prezidente Autoridade Bobonaro,Zeferino Soares dos Santos.Imajen/Antonio Goncalves

BOBONARO, 08 jullu 2020 (TATOLI)-Prezidente Autoridade Munisípiu Bobonaro, Zeferino Soares dos Santos, hateten ninia parte laiha karreta operasionál hodi suporta atividade no funsionamentu servisu kuarentena iha fronteira terrestre liliu atu tula ema ilegál sira hodi koloka  bá iha fatin kuarentena obrigatóriu ne’ebé estabelesidu ona iha Motain.

Durante implementasaun Estadu Emerjénsia, Nia esplika Komisaun Integradu ba Prevensaun COVID-19 ne’ebé nia rasik lidera, jere rekursu liliu transporte kada liña ministeriál iha Munisípiu ne’e hodi tula sidadaun sira ne’ebé mak ultrapasa fronteira ho dalan ilegál hodi lori bá iha fatin kuarentena.

Maibé, Zeferino dehan oras ne’e, defisil atu kontinua fahe responsabilidade tanba Instituisaun Estadu idaidak tenki hala’o fila-fali sira-nia servisu hanesan baibain.

“Durante implementasaun Estadu Emerjénsia ami fahe servisu ba malu, kada instituisaun ida responsabiliza ba loron ida hodi tula ema ilegál hodi lori ba kuarentena, maibé agora defisil tanba instituisaun idaidak tenki hala’o sira-nia servisu,”dehan, Zeferino Soares dos Santos, ba TATOLI, via telefone, ohin.

Entretantu, iha tersa ne’e, Prezidente Autoridade Munisípiu Bobonaro, Zeferino Soares dos Santos, relata ona problema ne’e ba Vise Ministru Saúde, Bonifácio Maucoli dos Reis, bainhira distribui materiál prevensaun COVID-19 ba PNTL liliu Unidade Patrullamentu Fronteira (UPF) iha Munisípiu Bobonaro.

“Ami  mós hato’o ona preokupasaun ba ekipa taks force ne’ebé kontinua hala’o servisu , no prekupasaun kona-ba apoiu servisu materiál ba prevensaun COVID-19 nian no mós asuntu seluk liliu iha relasaun kuarentena ne’ebé estabelese iha munisípiu Bobonaro no mós apoiu transporte ruma hodi ajuda ami bele tula ema ilegál sira ne’ebé Polisia kaer atu bele tula mai kuarentena,”dehan Nia.

Hatan ba preokupasaun ne’e, Vise Ministru Saúde, Bonifácio Maucoli dos Reis, hateten Miinistériu Saúde laiha transporte hodi responde urjente ba pedidu ne’e,  maibé kestaun ne’e nia rejista atu hato’o iha reuniaun Konsellu Ministru.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here