Eis Ministru Negosiu Estranjeiru no Kooperasau, Zacarias Albano da Costa.foto espesial.

DILI, 07 jullu 2020 (TATOLI)-Ministériu Negósiu Estranjeiru no Kooperasaun (MNEK) sei propoin Zacarias Albano da Costa, atu kandidata an ba Sekretáriu Ezekutivu  Komunidade Nasaun Sira Ko’alia Lian Portugés (CPLP-sigla portugés) ba tinan 2021.

Eis Ministru Negósiu Estranjeiru no Kooperasaun Zacarias Albano da Costa, iha esperiénsia atu assume responsabilidade ne’e.

“Iha 2021 Sekretáriu Ezekutivu ba CPLP ne’e ita haruka ona kandidatura ba maibé tan de’it COVID-19 ne’e, entaun ida ne’e muda fali ba 2021, Cabo Verde entrega lai Prezidente ba Angola iha jullu mak foin kandidatu ne’e aprezenta ba Xefe Estadu hafoin Konsellu Ministru  halo apresiasaun no aprovasaun,” dehan, Diretór Assuntu CPLP MNEK, Avelino Fernandes Ximenes Pereira, ba jornalista sira iha edifísiu Praia dos Coqeiros Dili.

MNEK propoin Eis Governante ne’e tanba iha esperiénsia iha área diplomata,  iha relasaun di’ak ho nasaun seluk no mós parseiru internasionál sira.

“Zacarias Albano ema ida ne’ebé pertenente duni atu hala’o servisu iha Sekretáriu Ezekutivu, maibé, ami aprezenta ba Konsellu-Ministru mak foin bele deside,” tenik tan.

Nasaun CPLP sira sei hili ninia Sekretáriu Ezekutivu CPLP durante simeira CPLP ne’ebé sei hala’o iha  tinan oin.

“Tuir loloos CPLP nia Prezidensia ne’e hosi Cabo Verde atu entrega ba Angola iha setembru mai ne’e, maibé tenke adia ba tinan oin tanba COVID-19 entaun Prezidente sei hela nafatin ho Cabo Verde to’o  2021 mak bele entrega,” nia esplika.

Timor-Leste ninia preparasaun atu partisipa iha simeira CPLP tinan oin ne’e, nia dehan halo nafatin koordenasaun ho Sekretáriu Ezekutivu CPLP nian liuhosi misaun permanente Timor-Leste hamutuk ho CPLP iha Lisboa.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here