Sekretáriu Estadu Komunikasaun Sosiál (SECOMS, sigla portugés) no Sekretáriu Estadu Arte Kultura (SEAK) halo interasaun ho komunidade sira iha Aldeia Lenuk-Hun. Imajen/Osória Marques.

DILI, 06 jullu 2020 (TATOLI)–Governu liuhosi Sekretáriu Estadu Komunikasaun Sosiál (SECOMS, sigla portugés) no Sekretáriu Estadu Arte Kultura (SEAK) halo interasaun ho komunidade sira kona-ba “Disemina Progressu Dezenvolvimentu Nasionál no Programa Governu ba Oin” iha Aldeia Lenuk-Hun, Suku Camea, Postu Administrativu Cristo Rei, Munisípiu Dili.

“Normalmente ita liuhosi meiu komunikasaun sosiál hodi komunika atividade governativa ho interasaun direta iha Aldeia Lenuk-huun, ne’ebé mak mai ho setór rua (2). Ha’u mai ho Sekretáriu Estadu Arte Kultura nian, hodi troka ideia no hatán ba komunidade nia preokupasaun kona-ba kultura, edukasaun, desportu, infra-estrutura nian,”dehan Mericio Juvinal ‘Akara’ ba jornalista sira, iha Aledia Lenuk-huun, segunda ne’e.

Iha parte komunikasaun sosiál, nia hatutan, ohin mós deskute oinsá informasaun hotu ne’ebé mak komunidade hato’o sei liuhosi meiu komunikasaun sosiál, nune’e bele transmite ba iha nasionál.

“Ohin, komunidade aproveita iha interasaun ida-ne’e hodi hato’o sira-nia preokupasaun direta ne’ebé mak sira enfrenta iha aldeia ne’e. Ho ida-ne’e, ami hodi Estadu no Governu nia naran resposta preokupasaun hirak ne’e,” nia dehan. 

Sekretáriu Estadu ne’e hateten, preokupasaun hirak ne’e sei tuir prosesu lubuk ida tanba daudaun ne’e, Governu uza osan duodésimu nian tanba ne’e Governu labele promete katak aban ka bainrua.

“Preokupasaun iha, ita rejista hotu tau iha planu depois prosesu ba orsamentu nian. Bainhira hotu, sei lori ba Parlamentu Nasionál mak aprova ona mak foin projetu tékniku bele la’o no bele ezekuta. Tanba ne’e mak ha’u dehan sei iha prosesu naruk,” nia esplika.

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here