Prokuradór Jerál Repúblika, José Ximenes. Imajen/ António Gonçalves

DILI, 06 jullu 2020 (TATOLI)-Iha 2019, Ministériu Públiku (MP) rejista  inkéritu prosesu krime sa’e ba 3% hosi prosesu krime 11.1% iha 2018.

Prokuradór Jerál Repúblika (PJR) José Ximenes, liuhosi aprezentasaun relatóriu anuál ba Parlamentu Nasionál (PN), ohin, relata katak halo  balansu jerál ida, kona-ba movimentu prosesuál ne’ebé verifika iha Prokuradoria Repúblika Distritál sira, iha tinan lima ikus ne’e mak hanesan númeru hosi inkéritu-krime hirak ne’ebé tama iha Prokuradoria Repúblika Distritál sira mantein, iha tinan-2019, tendénsia hanesan kona-ba kreximentu evidensiadu iha tinan hirak liubá.

Nia tenik, dadus hirak ne’ebé hakerek iha informasaun anuál anteriór hatudu kuadru evolutivu hanesan tuir mai ne’e iha tinan-2015, númeru hosi inkéritu sira aumenta besik 7,5% relativamente ba tinan-2014; Iha tinan-2016, iha aumentu ida besik 7,9% relativamente ba tinan-2015; Iha tinan-2017, iha aumentu 2,6% relativamente ba tinan-2016 no iha tinan-2018, hetan aumentu besik 11,1% relasionadu ho tinan-2017 no iha tinan-2019 iha aumentu 3% relasionadu ho tinan-2018.

Nia klarifika, númeru ida ne’e indika liu-liu dinámika ho aumentu iha prosesu entradu sira. Pendénsia mantein, iha nivel ne’ebé razoavel, bainhira númeru hosi prosesu findu sira mós aumenta anualmente.

“Ha’u entende nafatin katak pendénsia tenkesér hetan resposta ho tan rekursu umanu no mós meiu materiál sira, maibé mós ho métodu servisu nian ne’ebé di’ak-liu no medida potensiadora efisiénsia nian,” esplika José Ximenes.

Prokurador Jerál José Ximenes hateten iha sentidu ida ne’e tenke interpreta meta sira, hirak ne’e tenke konsidera nu’udar estímulu ba asaun efisiente.

Iha tinan-2018 taxa rezolusaun nian (relasaun entre prosesu hirak ne’ebé tama no prosesu konkluídu sira) hamutuk 90% ka númeru totál hosi prosesu desididu sira korresponde ba 90% hosi númeru totál prosesu hirak ne’ebé tama.

Númeru totál hosi inkéritu konkluídu sira iha tinan-2019 supera iha prosesu  661 hosi tinan anteriór (inkéritu konkluídu 5,062 iha tinan-2019, kontra 4,401 iha tinan-2018).

Nia hatutan iha 2019 taxa rezolusaun nian (relasaun entre prosesu hirak ne’ebé tama no prosesu konkluídu sira) ultrapasa tiha barreira hosi 106,8%, (ka númeru totál hosi prosesu desididu sira boot liu númeru totál hosi prosesu hirak ne’ebé tama).

Tuir relatóriu Prokuradoria  Repúblika Distritál haat hanesan Dili, durante tinan-2019,   entrada inkéritu-krime 2,787. Iha períodu hanesan, Prokuradoria Repúblika Distritál mós konklui tiha inkéritu hamutuk 2,984 – ne’ebé arkiva tiha 1,447 no akuza tiha 1,520 no restante haruka tiha ba servisu sira seluk.

“Halo análize komparadu badak ida, ita haree katak inkéritu hirak ne’ebé tama iha Prokuradoria Repúblika Distritál Dili liuhosi 2,813 iha tinan-2018 ba 2,787 iha tinan-2019, ne’ebé signifika redusaun besik 1%,” esplika PGR José Ximenes.

Iha kontrapartida, rejista mós aumentu ida iha prosesu findu sira: hosi 2443 iha tinan-2018 ba fali 2984 iha tinan-2019, ne’ebé korresponde ho aumentu ida besik 22.1%.

Iha relatóriu ne’e haktuir, durante tinan-2019, majistradu sira Ministériu Públiku nian ne’ebé servisu iha Prokuradoria Repúblika Distritál Dili intervein ona iha sesaun julgamentu-krime 3,922 (67 hosi hirak ne’e julgamentu móvel ); iha audiénsia primeiru interrogatóriu judisiál ho arguidu detidu 118, aleinde ne’e, realiza ona dilijénsia iha sede inkéritu 697 no interpoin ka responde ona rekursu 10.

Investigasaun ba inkéritu hirak ne’ebé rejistadu iha Prokuradoria Repúblika Distritál Dili barak liu mak delega ba Ofisiál Justisa no órgaun sira polísia kriminál nian,  – ne’ebé 1,831 ba Ofisiál Justisa sira, 28 ba Polísia Sientífika Investigasaun Kriminál (PSIK) no 406 ba Polísia Nasionál Timór-Leste (PNTL).

Prokuradoria Repúblika Distritál Baucau durante tinan-2019, fó entrada iha Prokuradoria Repúblika Distritál Baucau inkéritu-krime hamutuk 812, kona-ba faktu hotu-hotu ne’ebé akontese iha área territoriál Distritu Judisiál Baucau nian, ne’ebé integra territóriu hosi Munisípiu sira Baucau, Manatuto, Viqueque no Lautem.

Númeru hosi inkéritu ne’ebé tama iha Prokuradoria Repúblika Distritál Baucau liu hosi 906 iha tinan-2018 ba 812 iha tinan-2019, ne’e signifika redusaun ida besik 10.4%.

Konklui ona inkéritu 845, hosi hirak ne’e akuzadu 520, arkivadu 313 no remetidu ba seksaun hirak seluk 12. Kompara ho tinan-2018, rejista tiha diminuisaun ki’ik ida iha prosesu findu sira :  862 iha tinan-2018 kontra 845 iha tinan-2019.

Durante 2019,  José Ximenes hateten Majistradu sira Ministériu Públiku nian ne’ebé servisu iha Prokuradoria Repúblika Distritál Baucau intervein ona iha sesaun julgamentu-krime 1,158 no audiénsia primeiru interrogatóriu judisiál ho arguidu detidu 32.

Investigasaun ba inkéritu sira, barak liu, delega ba Ofisiál Justisa sira (inkéritu 670). 79 delega ba Polísia Nasionál Timór-Leste (Servisu Investigasaun Kriminál), 7 ba Polísia Sientífika no Investigasaun Kriminál no 3 de’it mak ba Komisaun Anti-Korrupsaun.

Iha Prokuradoria Repúblika Distritál Baucau, knaar sira Kuradór ba Menór sira dezempeña hosi Prokuradór Repúblika ida, kumulativamente ho intervensaun iha prosesu kriminál sira. Maibé, durante tinan-2019, rejista tiha iha Kuradoria Menór no Família, prosesu (Administrativu) 45 ba efeitu instaurasaun asaun sira en reprezentasaun menór sira nian, hirak ne’e sura hamutuk 4 ne’ebé tranzita hosi tinan-2018.

Hosi prosesu (administrativu) 28 ne’ebé konklui ona fó fatin ba asaun judisiál no/ka arkiva tiha), tanba ne’e 12 mak sei pendente hela ba tinan 2020 ne’e.

Ba Prokuradoria Repúblika Distritál Suai, durante 2019, entrada iha Prokuradoria Repúblika Distritál Suai (ho área territoriál ne’ebé korresponde ba territóriu hosi Munisípiu sira, Covalima, Manufahi, Ainaro no Bobonaro) inkéritu-krime hamutuk 784. Komparativamente, númeru ida ne’e reprezenta aumentu ida 4,6% relativamente ba tinan-2018 (tinan ne’ebé rejista entrada 715).

Iha 2019, konklui ona inkéritu-krime hamutuk 715. Konsidera katak konklui ona inkéritu 678 iha tinan-2018 – iha aumentu iha prosesu rezolvidu sira, relativamente ba tinan anteriór, 5,5%.

Durante 2019, Majistradu sira Ministériu Públiku nian ne’ebé hala’o knaar iha Prokuradoria Repúblika Distritál Suai, intervein ona iha sesaun julgamentu-krime 930, audiénsia primeiru interrogatóriu judisiál  ho arguidu detidu 30 no sira realiza ona dilijénsia 12.

Maioria hosi inkéritu hirak ne’ebé rejista iha Prokuradoria Repúblika Distritál Suai  delega hotu ba Ofisiál Justisa no órgaun sira polísia nian, konforme indika tuirmai ne’e: 263 ba Ofisiál Justisa, 95 ba Polísia Nasionál Timór-Leste (Servisu Investigasaun Kriminál), 2 ba Polísia Sientífika Investigasaun Kriminál (PSIK) no 2 ba CAC.

Durante tinan-2019, rejista ona iha Kuradoria Menór no Família Prokuradoria Repúblika Distritál Suai prosesu (administrativu) 86 ba efeitu instaurasaun asaun sira en reprezentasaun menór sira, hosi hirak ne’e sura hamutuk tan ho 9 ne’ebé pendente hela iha tinan-2018.

Hosi prosesu administrativu hirak ne’e, 46 fó fatin ba asaun judisiál, no 3 arkiva tiha no restante 46 tranzita ba tinan-2020.

Ba Prokuradoria Repúblika Distritál Oe-Cusse

José Ximenes esklarese liután, durante 2019, fó entrada iha Prokuradoria Repúblika Distritál Oe-Cusse, inkéritu-krime 391 – iha redusaun ida besik 6,9% relativamente ba tinan-2018 (bainhira rejista entrada prosesu 420).

Iha tinan hanesan (2019), konklui ona inkéritu 299 : akuzadu 207, arkivadu 89 no 3 haruka ba seksaun seluk. Relasionadu ho prosesu findu sira, iha redusaun komparativamente ho tinan-2018 (tinan ne’ebé númeru hosi prosesu findu sira hamutuk 404). Ne’e liuliu tanba saúde majistradu nian.

Durante 2019, Majistradu Ministériu Públiku nian ne’ebé kolokadu iha Oe-Cusse intervein ona iha sesaun julgamentu-krime 182, audiénsia primeiru interrogatóriu judisiál 1 ho arguidu detidu no realiza ona dilijénsia 296.

Durante 2019, rejista tiha iha Kuradoria Menór no Família Prokuradoria Repúblika Distritál Oe-Cusse prosesu (administrativu) 04 destinadu atu rekolla elementu sira ba efeitu instaurasaun ba asaun sira en reprezentasaun ba menór sira – ne’ebé sura hamutuk ho  prosesu 2 seluk ne’ebé tranzita hosi tinan-2018, hamutuk hotu prosesu 6. Hosi totál ida ne’e, 5 fó fatin ba asaun hirak ne’ebé propoin ona ba tribunál no 1 tranzita ba tinan-2020.

Gabinete Sentrál Kombate Korrupsaun Rejista Kazu 249

Iha  2019, Prokuradoria Jerál Repúblika (PJR) liuhosi Gabinete Sentrál Kombate hasoru Korrupsaun no Kriminalidade Organizada no Servisu Kontensiozu Estadu rejista kazu hamutuk 249.

PGR José Ximenes, informa tan indísiu kazu 249 ne’e kompostu hosi kazu  korrupsaun 105 ne’ebé komete iha ezersísiu funsaun públiku sira no kazu 144 seluk kona-ba krime ho tipu seluk (kriminalidade organizada).

Iha análize badak ne’ebé halo komparasaun haree katak númeru totál hosi prosesu hirak ne’ebé tama iha Gabinete Sentrál iha tinan 2019 hamutuk 249, superiór liu tinan 2018 prosesu 157.

Iha tinan-2019, Majistradu sira Ministériu Públiku nian ne’ebé servisu iha Gabinete Sentrál realiza ona, dilijénsia ba inkéritu sira hamutuk 202 no sira partisipa mós iha sesaun sira julgamentu nian hamutuk 553 no iha audiénsia primeiru interrogatóriu judisiál hamutuk 28 ho arguidu detidu sira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here