Ilustrasaun. Imajen/Espesiál

DILI, 05 jullu 2020 (TATOLI) – Diretór Empregu Esteriór Sekretaria Estadu Formasaun Profisionál no Empregu (SEFOPE), Filomeno Soares, konfima traballadór timor-oan ida iha Korea Súl ho naran Carlito Ferreira hakotu iis iha sábadu kalan.

“Sim, adidu fó ona informasaun dehan ema husi Zumalai ida. Nia moras, maibé seidauk hatene klaru moras saida tanba ne’e seidauk bele ko’alia no mate horikalan,” tenik Diretór ne’e ba Agência Tatoli via telefónika, domingu ne’e.

Kona-ba oinsá maka mate-isin atu lori mai Timór, Filomeno Soares dehan sei iha koordenasaun entre nasaun-rua tanba daudaun aeroportu hotu sei taka.

“Tratamentu hanesan sira uluk ne’e, tanba agora iha situasaun COVID-19 aeroportu hotu seidauk loke, tanba ne’e ligasaun nasaun ho nasaun ne’ebé Governu ho Governu sei haree asuntu ne’e,” nia akresenta.

Tuir Jerente ne’e, daudaun parte SEFOPE sei haree atu haruka fila traballadór ne’ebé kontratu ramata ona, inklui matebian mós tama iha lista ne’e.

“Agora ami trata hela atu sira ne’ebé kontratu ramata ona bele fila, inklui matebian hotu tama lista ne’e. loloos sira mai hotu ona maibé tanba situasaun COVID-19 ne’e maka sira sei hein seluk ne’ebé kontratu seidauk ramata hodi sira bele mai dala-ida de’it,” nia subliña.

Bazeia dadus husi SEFOPE, traballadór iha Korea  Súl ne’ebé ramata ona kontratu hamutuk na’in-86 no posibilidade sei aumenta.

Ba asuntu ne’e, Governu liuhosi SEFOPE prevee ona orsamentu hamutuk $94.000 hodi lori fila traballadór timor-oan sira ne’ebé servisu iha Austrália no Korea Súl ne’ebé kontratu ramata ona ho koordenasaun husi Ministériu Negósiu Estranjeiru no Kooperasaun (MNEK).

Jornalista: Natalino Costa

Editora: Julia Chatarina

1 KOMENTÁRIU

  1. SEFOPE Iha Komitmento Bot Hodi Rezolve Problema Hirak Nebe’e Trabailhadores Sira Infrenta Mesmo Iha Rai Laran No Rai Liur🙏🙏👍👍

HAKEREK NO HATÁN

Please enter your comment!
Please enter your name here