Diskusaun meza redonda entre Parlamentu Nasionál no Sosiedade Sivíl ne’ebé organiza hosi Internasionál Republikanu Institutu (IRI), ne’ebé hala’o iha Salaun Konferénsia Tower, Fatuhada, Dili, sesta. Imajen Tatoli/Evaristo Soares Martins.

DILI, 03 jullu 2020 (TATOLI)—Reprezentante Sosiedade Sivíl atuál Diretór Ezekutivu FONGTIL, Daniel Santos do Carmo, informa relatóriu auditoria sosiál ne’ebé hala’o hosi Sosiedade Sivíl sira identifika preokupasaun barak iha setór edukasaun, infraestrutura bázika, agrikultura no inkluzaun sosiál.

Notísia Relevante: IRI Organiza Meza Redonda Kona-ba Impaktu EE no Prevensaun COVID-19

“Aprezentasaun deskobrimentu auditória sosiál setór edukasaun, infrastrutura bázika, agrikultura no inkluzaun sosiál iha tinan  2019 nian identifika preokupasaun barak tebes,” dehan Daniel Santos do Carmo, liuhosi diskusaun meza redonda entre Parlamentu Nasionál no Sosiedade Sivíl ne’ebé organiza hosi Internasionál Republikanu Institutu (IRI), ne’ebé hala’o iha Salaun Konferénsia Tower, Fatuhada, Dili, sesta ne’e.

Iha organizasaun 10 mak implementa ona Auditória Sosiál no iha setór edukasaun iha ONG 5 mak hanesan Asosiasaun HAK  halo auditória programa kualidade edukasaun iha munisípiu Ainaro, Timor Leste Coalition Education (TLCE) foka kona-ba Formasaun ba profesór sira ensinu báziku iha Timor-Leste.

Nune’e mós ONG Hametin Dezenvolvimento Igualidade (HDI)  foka kona-ba monitorizasaun no avaliasaun ba implementasaun Kurríkulu Nasionál Edukasaun Báziku Síklu Dauluk no Daruak 2014 iha munisípiu Ermera.

Hosi parte ONG FOKUPERS halo monitorizasaun ba fasilidade mobiliáriu iha eskola EBC Letefoho no EBC Fatuquero no ONG FUNDAMOR kona-ba kualidade hanorin iha EBC no filiál iha munisípiu Lautem.

Deskobrimentu auditória sosiál setór Edukasaun iha 2019 identifika preokupasaun mak hanesan manorin na’in no alunu sira preokupa dezde tempu naruk liu ba  hanesan kondisaun fíziku edifísiu eskola nian ne’ebé grave tebes, saneamentu báziku inklui bee-moos, sintina no hariis fatin laiha, mobiliáriu (meza no kadeira) la sufisiente, sala aula ne’ebé mínimu tebes.

Nune’e mós rekursu professor sira la sufisiente, laiha kondisaun mínimu ba profesór sira hodi halo servisu ba sira-ne’ebé hela dook hosi eskola, pesoál seguransa no moru eskola laiha.

Relatóriu hosi Sosiedade Sivíl ne’ebé lidera hosi FONGTIL ne’e relata, iha parte Polítika ministériu edukasaun nian hatudu profesór sira-nia koñesimentu kona-ba polítika kualidade hanorin 72% mak la hatene. Limitasaun iha aspetu balun hanesan lei rejime karreira profesór sira seidauk implementa di’ak iha eskola sira. Sala aprendizajen no profesór nian ne’ebé limitadu difikulta ba prosesu aprendizajen tanba estudante kuaze sala ida to’o liu 45 no livru dedátika la sufisiente ba alunu no profesór sira hodi hanorin.

Iha relatóriu auditoria sosiál ne’e konsidera Ministériu Edukasaun la implementa sistema “Rewarding no Penalty” iha eskola hodi fó motivasaun di’ak ba profesór sira-ne’ebé hanorin ho efetivu no fó sansaun ba profesór sira-ne’ebé la hanorin ho efetivu tuir lei edukasaun. Matadalan hanorin no kurríkulu hakerek iha lian Tetum de’it, nune’e la motiva profesór sira hodi aprende no hanorin ho língua portugés.

Limitasaun profesór sira iha eskola obriga profesór sira hodi hanorin ho matéria liu tolu (3) ho oras ne’ebé limitadu tebes, nune’e difisil ba sira atu hanorin di’ak. Profesór balun nia eskalaun no nível aumenta maibé to’o agora seidauk hetan osan retroativu bele difikulta sira-nia motivasaun hodi hanorin ho di’ak. Profesór sira barak mak tama ona idade reforma maibé ministériu da edukasaun seidauk hapara sira to’o agora.

Maske polítika hodi garantia kualidade hanorin implementa ona iha eskola maibé relatóriu ne’ebé fó-sai hosi Sosiedade Sivíl ne’e nota profesór sira-ne’ebé hanorin iha ensinu báziku sira maioria iha kapasidade limitadu iha língua ofisiál rua. Inklui, kapasidade hanorin, tékniku aprendizajen no seluk tan ne’ebé liuhusi peskiza ne’e deteta katak polítika kontributivu ba profesór sira la ajuda sira-nia moris di’ak.

Tanba sira-ne’ebé tama ona idade reforma sei kontribui 4% hosi sira-nia saláriu maibé ikus mai sira sei labele hetan fali sira-nia osan. Maioria profesór abandona eskola hodi mai simu sira saláriu iha banku no profesór balun ne’ebé hanorin iha EBC no EBF hela iha fatin dook hosi eskola.

Entretantu, iha relatóriu auditória sosiál ne’e halo deskobrimentu sira iha implementasaun Programa Dezenvolvimentu Integradu municipio(PDIM):

  1. Konsultasaun ba Planu perioridade PDIM nian iha respondente 44% mak hatán katak iha konsultasaun, respondente 17% mak hatan Laiha konsultasaun no 39% komunidade mak la hatene kona-ba  prosesu konsultasaun .
  2. Instituisaun ne’ebé fasilita prosesu konsultasaun, 16% respondente mak hatán la hatene no   84% mak hatán hatene instituisaun sira ne’ebé de’it mak halo konsultasaun ba prioridade munisípiu nian.
  3. Asesu tipu informasaun hanesan Dezeñu no BOQ númeru respondente mak hatete la hatene kona-ba BoQ 94% no respondente mak resposta hatene 6%.
  4. Koordenasaun servisu entre Strutura PDIM ho maneira regulár laos intensive.
  5. Mekanismu implementasaun konstrusaun fíziku no pagamentu seidauk  kumpri kalendáriu ne’ebé bazeia ba kontratu.

Ho relatóriu hosi Sosiedade Sivíl sira ne’e, Sosiedade Sivil sira  rekomenda ba Governu Timor-Leste:

  1. Ba KNPDIM liuhusi KRTP hodi muda metodolojia hili planu perioridade liuhosi aprosimasaun instrumentu mapamentu avansadu.
  2. Ba Konsellu Ministru no MAE hodi halo revizaun polítika númeru orsamentu anuál ba PDIM nune’e  fo oportunidade ba Lideransa Suku no komunidade anualmente hasa’e númeru perioridade iha suku.
  1. Ba MAE atu Desentraliza dokumentu ofisiál relevante ba PDIM liuhusi sistema portál munisipál atu nune’e hasa’e númeru públiku iha nível lokál bele asesu informasaun relasaun ho PDIM.
  2. Ba MAE liu husi KNPDIM presiza defini dekreitu lei 36/2016 artigu 17 kona-ba koordenasaun servisu Interministeriál relasaun ho polítika PDIM.
  3. Ba membru KRTP atu aselera verfikasaun dokumentu konstrusaun fíziku hodi fasilita kompañia sira implementa projetu tuir kalendáriu ne’ebé termina iha kontratu.
  4. Ba KRTP no Governu Lokál atu ajusta polítika aprovizionamentu munisípiu kona-ba utiliza materiál naun-fabrikanu relasaun konstrusaun fíziku tuir tipu konstrusaun.

“Inkluzaun sosiál maioria hosi respondente hateten katak programa apoiu subsídiu ba ema ho defisiente ne’e  impaktu di’ak uitoan ho 42%, respondente ho 35% hateten di’ak loos,  respondente ho 23% hateten di’ak no 0% hosi respondente ne’ebé maka la dehan  impaktu hosi programa refere,” Diretór FONGTIL ne’e hateten.

Entretantu, Prezidente Komisaun G, Deputadu António Verdiál de Sousa, konsidera relatóriu auditoria sosiál hosi sosiedade sivíl ne’e pertinente.

“Ha’u sei foti ita boot sira-nia relatóriu hodi formula halo didi’ak no ha’u sei foti iha plenária liuhosi deklarasaun polítika bankada KHUNTO nian iha plenária, Parlamentu Nasionál,” Deputadu António Verdiál informa liuhosi diskusaun meza redonda ne’e.

Forum ONG Timor Leste (FONGTIL) hanesan organizasaun sumbriña ba organizasaun Lokál, Nasionál no Internasionál ne’ebé halo knaar iha Timor-Leste. Agora daudaun FONGTIL iha membru hamutuk 230 ne’ebé komposta husi ONG Lokál no Nasionál 202 no Internasionál 27.

Iha tinan 2019 Forum ONG Timor-Leste (FONGTIL) halo kooperasaun ho VIII Governu liu husi Gabinete Apoiu Sosiedade Sivíl no Unidade Auditoria Sosiál hodi implementa atividade auditoria sosiál foka ba setór edukasaun, agrikultura, infrastrutura bázika no inkluzaun sosiál ho foku ba asesibilidade.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here