Ministru Obra Públika, Salvador Eugênio Soares dos Reis Pires entrega ofialmente dekretu-lei tolu kona ba planu urbanu hanesan ba Vise Primeiru-Ministru no Ministru Planu no Ordenamentu, José Maria dos Reis. Imajen Tatoli/Florêncio Miranda Ximenes

DILI, 03 jullu 2020 (TATOLI) Ministru Obra Públika, Salvador Eugênio Soares dos Reis Pires entrega ofisialmente esbosu Dekretu-Lei tolu kona-ba Planu Urbanu hanesan hanesan Lei Jestaun Territoriál, Klasifikasaun Uzu Solu no Urbanizasaun inklui Edifikasaun Urbanu ba Vise Primeiru-Ministru no Ministru Planu no Ordenamentu, José Maria dos Reis atu haree.

“Ha’u mai ofisialmente entrega esbosu Dekretu-Lei tolu Planu Urbanu ba Vise Primeiru-Ministru no Ministru Planu no Ordenamentu atu haree nia kontiúdu atu kontinua avansa ba diskusaun no aprovasaun iha konsellu Ministru,” tenik Ministru Salvador iha edifísiu Ministériu Planu no Ordenamentu (MPO), Fatuhada, sesta ne’e.

Ministériu Obra Públika (MOP) halo preparasaun ba lejizlasaun ne’e ho koordenasaun Ministériu Reforma Lejizlativa no Asuntu Parlamentár (MRLAP) no Prezidénsia Konsellu Ministru (PKM), ne’ebé daudaun hein desizaun husi Konsellu Ministru.

“Kabe ona kompeténsia Minisitru Planu no Ordenamentu nian. Ami entrega esbosu dekretu-lei tolu ne’e tanba mudansa konjutura polítika no ministériu ne’ebé iha kompeténsia atu haree ba ordenamentu territoriál mak Ministériu Planu no Ordenamentu,” nia akresenta.

Antes ne’e, Ministru José Reis informa kona-ba espesífiku baze instrumentu sira no baze legál bele estabele no sustenta asaun planeamentu urbanu presiza koordenasaun ho liña ministériu.

Hanesan jestaun movimentu transporte no tráfiku, tuir ministru ne’e kabe ba kapasidade Ministériu Transporte no Komunikasaun (MTK) maibé ho vizaun presiza melloramentu rede estrada no ponte atu fasilita movimentu.

Rezultadu progresu servisu MOP iha tinan-2019 iha área Abitasaun no Planeamentu Urbanu maka hanesan programa atu harii uma ho unidade 4,000 iha sidade Dili, estudu pre-viabilidade no identifikasaun sítiu kompletu ona no tama faze negosiasaun ho parseiru internasionál hanesan International Finance Corporation (IFC) no parséiru dezenvolvimentu sira atu dezenvolve estudu no dezeñu ho modalidade PPP (Parseiru Públiku Privadu).

MOP hahú Estabelese enkuadramentu legál sira no planeamentu urbanu ba sidade Dili no munisípiu hodi promove lei tolu hanesan Planeamentu Territoriál, Edifikasaun Urbanu, no Kualifikasaun no Klasifikasaun Uzu Solu.

MOP mós estabelese ona akordu ho parseiru dezenvolvimento hanesan Organizasaun Nasaun Unida (ONU) ba asuntu abitasaun hodi apoiu harii planeamentu territoriál ba Dili no prosedimentu kontrolu dezenvolvimentu fíziku no lansa ona konkursu ba estudu revitalizasaun polu dezenvolvimentu ba Batugade no munisípiu seluk.

Aleinde ne’e, MOP mós hala’o ona revizaun kustu unitáriu ba konstrusaun Eskola Vokasionál Politékniku no Akademia Peska iha Betano, Manatuto no Lautém no Estudu Planu Mestre ba Hospital Nacional Guido Valadares (HNGV), Ospitál Lahane no Sidade Universitáriu iha Munisípiu Aileu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here