Traballadór sira hatun foos iha Portu Dili. Imajen Tatoli/António Gonçalves

DILI, 03 jullu 2020 (TATOLI) – Governu liuhosi reuniaun Konsellu Ministru estraordinária iha loron 21 maiu, delega kompeténsia ba Prezidente Sentru Lojíztiku Nasionál (CLN, sigla portugés), Agusto Junior Trindade hanesan reprezentante Governu nian ne’ebé maka iha kompeténsia bele selebra kontratu ho Governu Repúblika Sosialista Vietname hodi sosa foos tonelada 30.000 resin.

“Kontratu ba akizasaun foos husi Vietname ita asina ona iha 22 maiu no ita lori ba Tribunál atu hetan vistu préviu husi Tribunál Câmara das Contas. Vistu préviu ita hetan ona,” tenik Prezidente CLN ba Agência Tatoli via telefónika, foin lalais ne’e.

Tuir Jerente ne’e, prosesu husi parte CLN no Komisaun Nasionál Aprovizionamentu (CNA, sigla portugés kuaze ramata ona.

“Ami halo ona pedidu ba Konsellu Ministru no hetan ona kompeténsia no ami submete ona ba CNA hodi halo servisu preparasaun kontratu, maibé daudaun servisu hotu konklui ona no agora faze tuir kriasaun ba nota kréditu (LC, Letter of Credit) oinsá foos ne’e atu mai,” nia informa.

Tanba ne’e, parte Ministériu Finansa esforsu hela atu prepara halo LC nune’e ba faze tuirmai atu importa foos mai Timor-Leste.

“Ita Presiza maka LC no Señor Ministru Finansa asina ona karta ida ba Banku Sentrál hodi prosesa ba kriasaun LC ne’e rasik,” nia akresenta.

Bainhira nota kréditu iha ona maka prosesu importasaun husi Vietnam bele mai ona Timor-Leste.

“Banku Sentrál sei hasai karta hodi haruka ba Banku Nasionál Komérsiu Timor-Leste (BNCTL, sigla portugés) hodi prosesa nota kréditu, entaun faze tuirmai parte BNCTL hasai kopia ba parte Vietname, nune’e sira bele haruka ona foos mai Timor-Leste,” dehan Prezidente CLN.

Nia parte iha esperansa foos importasaun ne’e bele to’o iha Timor-Leste iha jullu nia laran.

“Ita-nia esperansa maka foos ne’e bele to’o iha ne’e maibé importante maka idaidak ninia servisu bele konklui,” nia subliña.

Planu sosa foos ne’e tama mós iha pakote sosio-ekonómiku nian, ne’ebé hetan ona aprovasaun hosi Konsellu Ministru antes ne’e hamutuk ho medida sira seluk iha pakote ekonómiku.

Antes ne’e, Prezidente CLN deklara daudaun ne’e stock nasionál ne’ebé parte CLN no setór privadu iha la sufisiente ona atu responde nesesidade populasaun Timor-Leste bainhira infrenta situasaun ruma iha fulan-tolu ka haat mai.

CLN to’o oras ne’e iha de’it foos tonelada 196, enkuantu tuir dirijente ne’e, konsume nasionál foos ba fulan-ida hamutuk tonelada 11.142, tanba ne’e bainhira foos husi Vietname mai tan sei bele sustenta populasaun durante fulan-tolu nia laran.

Setór privadu sira mós halo ona akizisaun foos husi rai-li’ur hodi haforsa stock nasionál.

Foin lalais, foos hamutuk tonelada 2.700 ho na’in husi Timor Food, Lda, atraka iha Portu Dili.

Primeiru Vise Prezidente Autoridade Portuáriu Timor-Leste (APORTIL), José Manuel Marques, informa tan durante períodu Estadu Emerjénsia, foos hamutuk tonelada 4.150 husi rai-li’ur maka to’o Timor-Leste no nain maka setór privadu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here