Saudoza Adelia Soares Martins Sarmento "Cristal" (tuur iha klaran) hamutuk ho funu-na’in sira. Imajen/Facebook.

Saudoza Cristal nu’udár feto kombantente ne’ebé firme iha konviksaun no sakrifiika nia-aan, hodi simu detensaun no persegisaun todan oin-oin tanba saudoza iha prinsípiu luta nian ne’ebé dehan “AMI FETO TIMOR ASEITA MATE, DUKE ATAN BA MILITAR INDONÉZIA SIRA”.

DILI, 03 jullu 2020 (TATOLI)–Funu-na’in sira no na’in ba funu sira. La’os mane sira de’it mak funu-na’in. La’os mane sira de’it mak eroi. La’os mane sira de’it mak luta-na’in. La’os mane sira de’it mak maun-abut. La’os mane sira de’it mak hatene liberta rai no povu Timor-Leste hosi tauk ida nakukun nian.

Iha mane funu-na’in sira-nia leet, iha mós feto funu-na’in sira ne’ebé hamriik firme hodi halo funu. Iha mane eroi sira nia sorin, iha mós feto eroina sira mak hananu makaas. Iha mane luta-na’in sira nia sorin-sorin, iha mós feto luta-na’in sira-nia kontribuisaun luta ba rai ida-ne’e.

Iha mane sira no maun abut sira-nia luta, iha feto-abut lubun mak hametin sira-nia abut hodi luta hamutuk ho mane hirak ne’e hodi hadau ukun rasik-aan. Iha mane luta-na’in sira nia lalatak (mane luta ho kilat), iha feto luta-na’in sira luta ho sira-nia isin-lolon hasoru invazór sira—dalaua’in feto sira hodi sakrifika sira-nia aan liuliu sira-nia isin-lolon atu bele manan funu no manan ukun rasik-aan be kmanek.

Tanba funu ne’e kmanek. Tanba luta ne’e kmanek. Tanba terus ne’e kmanek liu osan-mean horu-hotu mak Saudoza Adelia Soares Martins Sarmento “Cristal”, durante iha nia moris no ninia luta tomak, nia sempre komu liman ho luta-na’in sira seluk hodi tuku ninia hirus-matan nu’udar “FETO TIMOR-LESTE” ida be hahí no hanai ninia prinsipiu luta nian katak “Ami Feto Timor Aseita Mate, Duké Atan Ba Militár Indonézia Sira”.

Saudoza Adelia Soares Martins Sarmento “Cristal” ne’ebe iha loron hirak liuba hakotu iis. moris iha Lahane Osidentál Dili, iha loron 26 fulan Setembru tinan 1971. Saudoza moris hosi Aman Francisco Martins Sarmento, no Inan Eduarda da Conceição Sarmento.

Saudoza mai hosi família uma-lisan Umboku Kay Lulik Welaluhu, Postu Fatuberliu, Munisípiu Manufahi. 

Saudoza oan ba da-haat husi maun-alin na’in-6, saudoza forma ona uma-kain ho señór Benedicto da Costa Xavier iha tinan 1998 no sira na’in-2 iha oan ‘na’in-4, feto na’in-2 no mane na’in-2’.

Prosesu ba Saudoza Cristal nia edukasaun formal, iha tinan 1987 Saudoza Cristal ramata ninia estudu iha Eskola Primária Númeru 09 Villa-verde Dili. Iha tinan 1990 Saudoza ramata nia estudu iha Ensinu Pre-sekundária Fatu Meta DILI. Iha tinan 1993 Saudoza ramata ninia estudu iha ensinu sekundária iha Escola Ekonómia do Ensino Mediu (SMEA) Bekora DILI. 

Envolvimentu Saudoza iha funu kontra okupasaun ilegál Militár Indonézia nian. Saudoza hahú involve iha rede rezisténsia klandestina ho grupu OJETIL komesa iha tinan 1989. Iha 1991 saudoza nu’udár mobilizadora masa ba manifestasaun masakre Santa Cruz.

Saudoza Adelia Soares Martins Sarmento “Cristal”. Imajen/Facebook.

Aleinde ida ne’e, Saudoza mós hola parte iha ekipa organizasaun juventude sira hodi halo preparasaun ba vizita Ró Lusiatania ne’ebé mak mai atu fó omenajen ba saudozu sira nia mate ba masakre Santa Cruz iha tinan 1991. Iha tinan 1991, Saudoza Cristal mós organiza no mobiliza juventude sira iha uma Saudoza nian Vila Verde Dili hodi hasoru  Saudozu Julio L-7 ki’ik atu simu Krensa Sagrada Família no habelar liu tan krensa sagradu ida ne’e, ba juventude sira seluk iha Dili laran.

No iha parte seluk, hala’o mós serimónia ritual hosi Sagrada Família hodi hasa’e espíritu barani rezisténsia ka revolusionáriu nian ba juventude sira hodi hametin unidade, fraternidade no enkoraja juventude sira hodi haforsa fiar ba determinasaun ukun rasik aan.

Saudoza nia envolvimentu iha luta ba ukun rasik-aan depois de Masakre Santa Cruz. No hosi ligasaun ne’ebé estabelese ona husi Saudoza Cristal ho nian kolega sira hanesan mana Zina, mana Celina, mana Candida, maun Egidio, maun Afonso no kombatente sira seluk nian apoiu, saudoza no maluk seluk ba hasoru Komandante Cornelio Gama alias L-7 (L Foho Rai Boot) iha Wairua-Daragua Postu Laga.

Hafoin hasoru malu iha ne’ebá, Komandante Cornelio Gama alias L-7 (L Foho Rai Boot), Saudozu Cipriano Ribeiro Martins alias Rodak Ran Nakali Teki Timor Lemorai nudár Komandante FALINTIL no Fundadór Sagrada Família haruka estrutura Sagrada Família husi ai-laran mai Dili.

Nune’e, hahú husi 1993, saudoza Cristal asume responsabilidade nu’udár responsavel másimu ba organizasaun rezisténsia sagrada família hamutuk ho saudozu Andre da Costa Belo (L-4). Saudozu Andre da Costa Belo (L-4) nu’udár responsável ba membru Sagrada Família mane no saudoza Cristal hanesan responsável ba OPMT.

Kargu servisu sira ne’e, bazeia ba orientasaun mai hosi komandu FALINTIL, Komandante Cornelio Gama L-7 (L Foho Rai Boot) no Saudozu Cipriano Ribeiro Martins (RODAK RÁN NAKALI TEKI TIMUR LEMORAI). Hosi ne’e ba oin, Saudoza Cristal hola parte ona iha estrutura permanente luta nian ne’ebé definidu husi Komandante FALINTIL no Fundadór Sagrada Família nian.

Saudoza Cristal hamutuk ho Saudozu Andre da Costa (L-4) nu’udár lideransa másimu Organizasaun Rezisténsia Sagrada Família nian, tama sai uma, organiza juventude sira, tatoli lia menon sira ba FALINTIL nian, ba kuadru sira rezisténsia nian, militante sira ne’ebé fila husi baze de apoiu no rekruta juventude foun sira, hosi ibun ba ibun hodi habelar rede rezisténsia, koordena, organiza no mobiliza membru sira ba manifestasaun oin-oin hanesan manifestasaun iha edifisíu DPR, Otél Timor.

Iha fatin sira seluk, ne’ebé nu’udár manifestasaun rezisténsia nian kontra okupasaun ilegál Militár Indonézia hanesan Rejime Ditadór Suharto nian.

Saudoza Cristal, mós organiza no mobiliza feto sira iha fatin oin-oin, bairru oin-oin iha Dili no fatin sira seluk hodi prepara hasa’e espíritu nasionalizmu no patriotizmu rezisténsia nian, hodi habarani no kontinua firme kontra invazór no okupante ilegál sira.

Saudoza Cristal mós organiza no mobilizasaun liuhosi fahe krensa (fitas) mean-mutin ba feto no mean-metan ba mane. Fitas sira nee nu’udár forsa espirituál hodi lori luta naruk ne’e ba oin to’o hetan independénsia total. 

Saudoza Cristal nu’udár feto kombantente ne’ebé firme iha konviksaun no sakrifiika nia-aan, hodi simu detensaun no persegisaun todan oin-oin tanba saudoza iha prinsípiu luta nian ne’ebé dehan “AMI FETO TIMOR ASEITA MATE, DUKE ATAN BA MILITAR INDONÉZIA SIRA”.

Hafoin Livre hosi okupasaun ilegál militar Indonézia nian, Saudoza Cristal hetan ona rekoñesimentu ba dedikasaun luta libertasaun nasionál husi estadu RDTL ne’ebé harii hosi ruin ho ran. No ikus Saudoza Cristal hetan kondekorasaun ba Ordem de Nicolao dos Reis “Lobato” iha loron 15 Dezembru 2012.

Estadu Timor-Leste mós rekoñese Saudoza Cristal ho dedidkasaun esklusivu no fornese ona pensaun subsistensia nian ho durasaun partisipasaun 8 a 14. 

Depois de ukun rasik aan, Saudoza Adelia Soares Martins Sarmento alias “Cristal”, nunka sura nia kolen, maibé nafatin fó ninia dedikasaun tomak ba partisipasaun konstrusaun estadu RDTL, inklui Saudoza Adelia Soares Martins Sarmento alias “Cristal”, ativa no organiza nafatin membru sagrada família hodi halo serimónia ritual kreansa sagrada família nian iha territóriu tomak. Adisionalmente, Saudoza Adelia Soares Martins Sarmento alias “Cristal”, nafatin organiza membru OSF no kolega rezisténsia sira, hodi fó solidariedade no enkoraja malu hodi konsolida espíritu demokrasia liu husi organizasaun rezisténsia no partidu Polítiku sira hodi eleva estadu de Direitu de Demokrátiku Timor-Leste ne’ebé seguru. 

Obrigadu Wain ba Saudoza Adelia Soares Martins Sarmento “CRISTAL”, ita-boot nia Kontribuisaun no dedikasaun hotu ne’ebé haraik ona ba esforsu koletivu povu nian, ba Luta kontra okupasaun Indonézia.

Adeus Saudoza Adelia Soares Martins Sarmento “CRISTAL”, ami sei la haluha saudoza nia totalidade tomak ba rai ida nee, no ami fiar katak ita-boot nia espiritu sei nafatin akompana ho ami, atu haburas liu tan ita-nia Organizasaun Sagrada Família no prezerva liu tan istoria rezistensia nian ba luta hodi defende soberania RDTL.

Jornalista  : Osória Marques

Editór        :  Cancio Ximenes

HAKEREK NO HATÁN

Please enter your comment!
Please enter your name here