DILI, 02 jullu 2020 (TATOLI) – Primeiru-Ministru (PM), Taur Matan Ruak husu ba Ministériu Negósiu Estranjeiru no Kooperasaun (MNEK) atu reforsa kooperasaun bilaterál ho nasaun sudeste aziátiku hodi lori Timor-Leste adere ba Asosiasaun Nasaun iha Sudeste Aziátiku (ASEAN, sigla inglés).
“Ida-ne’e hanesan enkontru dahuluk MNEK ho Primeiru-Ministru no asuntu ne’ebé ami ko’alia mak kona-ba prosesu adezaun ba ASEAN ne’ebé mak la’o hela. Kona-ba adezaun Timor-Leste nian ba ASEAN, Xefe Governu husu atu parte ministériu reforsa kooperasaun bilaterál ho rai sira membru ASEAN nune’e no ativu iha organizasaun multilaterál hodi halo ema koñese di’ak liután ita-nia rain,” Ministra Negósiu Estranjeiru no Kooperasaun, Adaljiza Albertina Xavier Reis Magno, hafoin enkontru ho Xefe Governu iha Palásiu Governu, kinta ne’e.
Iha enkontru ne’e, PM konta tuir kona-ba enkontru antes ne’e ho embaixadór sira.
“Primeiru-Ministru mós konta oitua kona-ba nia enkontru foin dadauk ho embaixadór sira kona-ba situasaun polítika rai-laran no oinsá atu rekupera fali ekonomia,” dehan Adaljiza.
Biban ne’e, PM Taur mós husu MNEK kontinua akompaña sidadaun sira iha rai-liur.
Atu adere ba ASEAN, Governu Timor-Leste sei halo preparasaun ba pilár importante hanesan polítika no seguransa, ekonomia, no sósiu-kultura.
Antes ne’e, ekipa Fact Finding Mission ho delegasaun ema na’in-60 ba dahuluk mai Timor-Leste hodi halo avaliasaun ba preparasaun adere ba ASEAN.
Nune’e mós, Governu Timor-Leste liuhosi MNEK hamutuk ho liña ministeriál iha tinan 2019 liubá konsege responde ona pergunta hamutuk 60 husi Sekretariadu Organizasaun Sudeste Áziatiku kona-ba pilár sósiu no kultura, liuliu iha área edukasaun, saúde, jéneru, direitu labarik, ambientál no seluk tan.
Maski Timor-Leste responde ona pergunta hirak-ne’e maibé hosi parte ASEAN rasik seidauk públika ninia rezultadu, nune’e bele apoiu Governu halo preparasaun di’ak liután ba adezaun.
Jornalista: Antónia Gusmão
Editora: Julia Chatarina
