Sekretáriu Estadu Juventude no Desportu, Abrão Saldanha. Imajen/Espesiál

DILI, 02 jullu 2020 (TATOLI) – Sekretáriu Estadu Juventude no Desportu, Abrão Saldanha, Kompromete sei esforsu rezolve problema estádiu Munisipál Dili no Manatuto, tanba konsidera estádiu rua ne’e sai problema ida ba nia durante mandatu.

“Estádiu rua mak hanesan problema ne’ebé ha’u hasoru, hanesan Estádiu Munisipál Dili no Estádiu Manatuto tanba to’o agora seidauk rezolve. Maibé ha’u iha ona informasaun balun husi tékniku sira kona-ba estádiu rua ne’e,” hateten Abrão Saldanha hafoin ramata enkontru ho Primeiru-Ministru, Taur Matan Ruak iha Palásiu Governu, kinta ne’e.

Tuir informasaun hosi tékniku Sekretaria Estadu Juventude no Desportu (SEJD) katak empereza ne’ebé kaer obra rua ne’e hasoru problema iha finanseira.

“Empreza hasoru dezafíu iha finanseira, hanesan empreza ne’ebé kaer obra Estádiu Dili ne’e hasoru problema ho kontratu adisionál tanba iha kontratu insiál laiha. Iha ha’u nia fatin, ha’u rezolve maibé atu dehan katak estádiu rua ne’e problema,” nia akresenta.

Governante ne’e dehan, iha tempu besik sei bolu empreza rua ne’ebé ezekuta obra hodi hatene loloos ninia problema, tanba orsamentu ba konstrusaun ne’e la’ós iha SEJD maibé iha Sekretariadu Grande Projetu (SGP), tanba ne’e maka sei rekolla informasaun hotu no koordena ho ministériu relevante hodi rezolve problema.

Nia subliña, la’ós de’it estádiu mak sai problema maibé iha tán parte balun hanesan estudu no dezeñu ba kampu iha Dili, tanba tuir kontratu ne’ebé iha dezde 2017 to’o agora seidauk hotu.

Projetu reabilitasaun ba Estádiu Munisipál Dili antes ne’e toma konta husi kompañia Marino Interprise iha tinan 2015 ho montante orsamentu hamutuk millaun $1,5 no Governu konsege selu ona porsentu 70, maibé tanba la konsege finaliza obra ne’e maka Konsellu  Administrasaun Fundu Infraestrutura (KAFI) hamutuk ho Ajénsia Dezenvolvimentu Nasionál (ADN) foti ona desizaun hodi hapara kontratu ho kompañia no loke fali konkursu foun ba kompañia seluk atu kontinua hikas obra ne’e.

Tanba obra ne’e atrazadu, Governu foti desizaun entrega ba parte Inspesaun Jerál hodi halo investigasaun no rezultadu inspesaun ne’e hatudu katak kompañia labele ona kontinua kaer obra ne’e.

Enkuantu, konstrusaun ba Estádiu Manatuto ne’ebé tuir planu sei fó naran “Kay Rala Xanana Gusmão”, hahú iha tinan 2015 ho orsamentu hamutuk ba obra ne’e millaun $2, maibé Governu konsege selu ona pursentu 60 ba kompañia maski to’o ohin loron seidauk finaliza. 

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here