Sekretáriu Estadu Formasaun Profisionál no Empregu, Alarico do Rosário. Imajen Tatoli/Egas Cristovão

DILI, 02 jullu 2020 (TATOLI) – Sekretaria Estadu Formasaun profisionál no Empregu (SEFOPE) prevee ona orsamentu hamutuk $94.000 hodi lori fila traballador timor-oan sira ne’ebé servisu iha Austrália no Korea Súl ne’ebé kontratu ramata ona.

Sekretáriu Estadu Formasaun Profisionál no Empregu, Alarico do Rosário, hateten daudaun ne’e preparasaun lori fila traballadór sira ne’e iha hela prosesu tanba aeroportu sira seidauk loke ligadu ho pandemia COVID-19, tanba ne’e sei koordena ho nasaun refere.

“Ami halo ona esforsu no ami prevee ona orsamentu relasiona ho traballadór iha Austrália balun kontratu hotu ona no ami halo ona koordenasaun ho empreza sira oinsá atu estende traballadár sira-nia kontratu, balun hakarak estende balun mak hakarak fila mai Timór maibé ho situasaun COVID-19 ne’ebé aeroportu seidauk loke tanba ne’e ha’u husu atu pasiensia,” dehan Alarico ba Palásiu Governu, kinta ne’e.

Orsamentu ne’ebé prevee la’os de’it lori fila traballador hosi Australia maibé mós ba sira iha Korea Sul.

“Osan ne’e atu lori fila traballadór sira husi Korea mai tanba ita-nia traballadór sira ne’ebé kontratu mate ne’e hamutuk na’in-86 maibé posível amenta tán no agora daudaun Governu Korea fó ultimatu katak traballadór sira ne’e kontratu mate iha 10 jullu tanba ne’e tenke fila ona mai Timór. Ami esforsu ona hodi lori sira mai no sei koordena ho Ministériu Negósiu Estranjeiru no Kooperasaun,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here