Ministru Asuntu Parlamentár no Komunikasaun Sosiál, Francisco Jerónimo (loos), hamutuk ho Diretór Nasionál Diseminasaun Informasaun , Estevão Belo (karuk), fahe informasaun kona-ba Ofisiál Mídia sira, iha Palásiu Governu, kuarta (01/07). Imajen/MAPKOMS

DILI, 02 jullu 2020 (TATOLI) – Ministru Asuntu Parlamentár no Komunikasaun Sosiál, Francisco Jerónimo husu ba Ofisiál Mídia iha ne’ebé hala’o kna’ar iha ministériu sira labele promove de’it atividade Governu iha portál ministériu nian maibé tenki fó prioridade mós ba iha Portál Governu.

“Ha’u hanoin prioridade ne’ebé ita-bo’ot sira tenke halo maka informasaun Governu nia hotu tenke atualiza kada loron iha Portál Governu tanba portál ne’e Governu nian no labele fó uluk prioridade ba ita-bo’ot sira-nia ministériu,” tenik Ministru Francisco bainhira hala’o sorumutu trimestrál ho Ofisiál Mídia, iha Sala Prezidénsia Konsellu Ministru, Palásiu Governu, kuarta ne’e.

Tuir Ministru, Ofisiál Mídia hanesan xave hodi divulga prestasaun servisu Governu nian atu nune’e públiku bele akompaña atividade saida de’it maka Governu halo.

“Tenki tau importánsia ba servisu Ofisiál Mídia sira tamba sira maka sai hanesan xave ne’ebé bele hatudu Governu nia kbi’it no rezultadu servisu,” nia akresenta.

Iha enkontru ne’e, Ministru Jerónimo apela ba Ofisiál Mídia sira tenke hala’o servisu hodi disemina atividade hotu ne’ebé ministériu hala’o hahú husi ministériu to’o nível diresaun.

Nia rekoñese, papél sira nia la’ós hasai de’it fotografia maibé tenki hala’o mós kna’ar hanesan jornalista hodi atualiza informasaun kada loron relasiona ho atividade ministériu nian.

Iha biban ne’e, Diretór Nasionál Diseminasaun Informasaun (DNDI), Estevão Belo, hateten objetivu husi enkontru ne’e atu atualiza informasaun ba Ofisiál Mídia sira kona-ba oinsá kontribui notísia ba iha Portál Governu liuliu atividade sira ne’ebé hala’o husi membru Governu sira.

Enkontru ne’ebé organiza husi DNDI ne’e partisipa husi Sekretaria Estadu Komunikasaun Sosiál, Merício Juvinal dos Reis ‘Akara’, Ofisiál Mídia husi kada ministériu inklui funsionáriu Ministériu Asuntu Parlamentár no Komunikasaun Sosiál (MAPKOMS).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here