Sekretáriu Estadu Kooperativa, Elizário Ferreira. Imajen Tatoli/Egas Cristovão

DILI, 02 jullu 2020 (TATOLI) – Sekretáriu Estadu Kooperativa, Elizário Ferreira, haktuir katak iha reuniaun ho Primeiru-Ministru (PM), Taur Matan Ruak, nia parte simu orientasaun atu harii koperativa komunitária.

“Orientasaun prioridade dahuluk husi Primeiru-Ministru nian maka oinsá bele kria kooperativa ba komunitária, signifika komunidade sira iha hotu kooperativa. Ha’u hanoin orientasaun ida mós hanesan obriga ami atu halo servisu  di’ak liután atubele alkasa orientasaun ida-ne’e,” tenik Elizário Ferreira hafoin ramata enkotru ho PM Taur iha Palásiu Governu, kinta ne’e.

Daudaun ne’e iha 161 grupu produtivu no kooperativa kréditu 81, no husi totál ne’e 42 maka funsiona di’ak maski ho situasaun ba oin frajil oituan maibé husi kooperativa sira ne’e konsege akumula ona millaun $6,8.

Grupu kooperativa 42 maka hetan oituan difikuldade tanba tinan-rua husi 2018 to’o ohin loron hetan rendimentu oituan.

“Ami lakon millaun $1,3 maibé ida-ne’e to’o agora kooperativa seidauk lamenta tanba iha jestaun ne’ebé di’ak tebes ba oin,” nia akresenta.

Tanba  ne’e, bazeia ba orientasaun  jerál  ne’ebé maka Xefe Governu hato’o hodi hamosu kooperativa kréditu ida iha kada postu administrativa.

“Kooperativa kréditu ida atu hahú, ezemplu inisiál ho membru ema na’in-60 no husi totál ne’ebasta de’it kada ema ida kontribui $65 no hetan ona $309, ne’ebé $309 husi 65 ne’e barak ona,” nia subliña.

Tuir governante ne’e, misaun kooperativa maka bele netraliza  situasaun ekonómiku to’o baze, liuliu dada kapitál finaseira besik ba povu  halo povu besik ba kooperativa no povu besik ba osan ne’ebé maka Estadu iha.

Biban hanesan, nia rekoñese kooperativa balun ne’ebé hetan ajuda husi Governu daudaun ne’e barak maka mate.

“Kooperativa ne’ebé maka hetan subsídiu, oras ne’e balun lulun biti tiha ona. Agora kooperativa sira ne’ebé maka la simu subsídiu maka moris no hatama osan,” nia akresenta.

Kooperativa kréditu dezde dezembru  2011 halo ona deklarasaun katak labele simu osan ba ninian kapitál impréstimu.

“Bele simu kadeira, meza, osan no formasaun maibé labele simu osan ba kapitál. Kuandu simu, kestaun maka ita Timór ne’e espíritu solidaridade maka’as. Ita buka atu minimiza kustu sira ne’e no kondisaun sosiál ekonómiku ne’ebé maka ita-nia komunidade enfenta,” Elizário realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here