Xefe Departamentu Saneamentu Munisípiu Dili, Domingos Soriano.Imajen Tatoli/Osória Marques.

DILI, 02 jullu 2020 (TATOLI)–Xefe Departamentu Saneamentu Munisípiu Dili, Domingos Soriano, informa saneamentu mós halo ona proposta ba prosesu subsídiu nian ba autoridade munisipál ne’ebé mak tutela ba ne’e, maibé seidauk iha resposta to’o ohin loron.

Maibé, Domingos Soriano hatutan, proposta ne’ebé mak ami hamutuk ho prezidente autoridade ajusta ona ba Ministériu Administrasaun Estatal (MAE) katak ekipa saneamentu sira mós sei hetan subsídiu COVID-19 hamutuk na’in-340.

“Proposta ne’ebé mak ami hamutuk ho prezidente autoridade ajusta ona ba Ministériu Administrasaun Estatal (MAE) katak ita-nia ekipa saneamentu sira mós sei hetan subsídiu COVID-19 hamutuk na’in-340. Ekipa sira ne’e kompostu hosi saneamnetu na’in-200, ema ne’ebé mak hamoos no raut foer iha valeta no jardín sira mak na’in-140,” dehan Xefe Departamentu Saneamentu Munisípiu Dili, Domingos Soriano, Agência TATOLI iha nia knaar fatin Matadouro, Dili, kinta ne’e.

Tanba, nia dehan, Governu anúnsia ona katak atu servisu saneamentu mós iha subsídiu ba liña frente tanba sira hamoos no raut foer iha dalan públiku sira durante implementa Estadu Emerjénsia (EE) iha propagagasaun surtu COVID-19 iha Timor-Leste

“Iha Estadu Emerjénsia (EE) dahuluk nian, ita rona katak ema ne’ebé mak servisu iha saúde, seguransa inklui saneamentu mós hetan subsídiu ba liña frente nian. Maibé to’o agora laiha inforamasaun ida kona-ba subsídiu ne’e,” nia dehan.

Tanba ne’e, nia husu ba parte kompetente sira atu prosesu no aselera traballadór sira-nia kolen hodi nune’e sira mós bele hetan subsídiu ne’e. Tanba iha EE dahuluk susar loos atu konsentra ema barak hodi halo sersivu iha dalan públiku sira.

“Iha EE dahuluk nian, ha’u atu hatete, ba ita-boot sira katak susar ba ita atu halibur ema barak iha grupu ida tanba ema barak mak tauk ho moras COVID-19. Maibé ho esforsu no baidnas ne’ebé traballadór sira iha, entaun ita-nia trablladór sira kontinua servisu,” nia haktuir.

Nia dehan, hafoin Estadu Emerjénsia (EE) liu tiha, servisu saneamentu laiha loron deskansa ba traballadór saneamentu nian, tanba ne’e Governu presiza tau atensaun.

“Ami-nia servisu iha área saneamentu laiha loron deskansa ka hela iha uma hodi izola-aan. Tanba, ita hotu hatene katak moras hotu-hotu inklui moras Coronavirus (COVID-19) ne’e mai hosi foer, entaun ami-nia servisu ne’e ita bele dehan katak laiha limitasaun servisu,” nia hateten.

Bainhira servisu saneamentu mak paradu, nia dehan, moras sira ne’e sei aumenta tan liuliu COVID-19 ne’ebé mak gosta moris iha foer laran.

“Governu presiza tau atensaun ba servisu saneamentu sira tanba sira mak hasoru direta moras, nune’e husu atu konsidera netik traballadór sira ne’e,” nia dehan.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here