Embaixadór Xina iha Timor-Leste, Xiao Jianguo. Imajen/Egas Cristovão

DILI, 01 jullu 2020 (TATOLI)-Governu Xina liuhusi ninia reprezentasaun iha Timor-Leste, kuarta ne’e entrega tan apoiu ekipamentu prevensaun surtu COVID-19 ba Ministériu Ensinu Superiór Siénsia no Kultura hodi distribui ba ensinu superiór sira iha TL.

Embaixadór Xiao Jianguo, maka entrega diretamente apoiu ne’e ba Ministru, Longuinhos dos Santos, iha edifísiu Embaixada Xina, Ai-Tarak-Laran Dili.

Notísia Relevante :MESSK Sei Distribui Apoiu Ekipamentu Prevensaun COVID-19 ba Ensinu Superiór Sira

“Ohin ita simu ona máskara 40.000 no hand sanitizer botir 560 ita sei halo distribuisaun ba institutu públiku no privada sira atu bele kontinua fahe ba estudante no dosente sira,” dehan MESSK, Longuinhos.

Ekipa MESSK sei hahú distribui apoiu ne’e ba universidade sira iha semana ida ne’e nia laran.

Totál estudante Universitáriu iha TL hamutuk rihun 65, no dosente 2.000. tanba ne’e nia dehan kuantidade ne’e la sufisiente maibé Governu sei buka meius hodi rezolve situasaun ne’e.

“Hanesan Membru  Governu hato’o agradese wain ba nasaun Xina tanba bele fó ona apoiu ho lalais ba Ministériu Ensinu Superiór Siénsia no Kultura atu halo prevensaun COVID-19,”nia hateten.

Entretantu, Embaixadór Xina, Xiao  Jianguo, sira fó apoiu ne’e bazeia ba pedidu husi Ministériu ne’e nian.

“Ami simu pedidu iha item haat  maibé oras ne’e  ami bele apoiu mak máskara  no hand sanitizer ami espera katak bele ajuda liutan estudante sira iha bainhira filafali ba eskola,”katak Xiao.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here