Komandante Seksaun Jéneru PNTL, Superintendente Julia da Gama. Imajen/Eugénio Pereira

DILI, 01 jullu 2020 (TATOLI)- Komandante Seksaun Jéneru Polísia Nasionál Timor-Leste (PNTL), Superintendente Julia da Gama, promete sei koopera ho parseiru estratéjiku sira iha rai-laran no rai-li’ur  hodi dezenvolve implementasaun estratéjia jéneru PNTL nian  (2018-2022)  hodi haree oinsá hasa’e númeru partisipasaun feto no promove igualdade jéneru iha PNTL.

“Oportunidade ida ne’e hanesan grasa no fiar ida ne’ebé Komandu PNTL fó fiar mai ha’u atu ezerse nafatin misaun PNTL nian iha parte jéneru nian. Ha’u sei kontinua dezenvolve planu estratéjia sira ne’ebé trasa ona tuir estratéjia dezenvolvimentu Timor-Leste katak, ema hotu- hotu tenke envolve aan iha dezenvolvimentu, signifika feto nia partisipasaun importante mós,” hateten Superintendente Julia da Gama, ba jornalista, ohin, hafoin simu pose iha Komandu Jerál PNTL, Caicoli, Dili.

Eis Komandante PNTL Munisípiu Manatuto ne’e hatutan, nia parte sei koordena nafatin ho membru PNTL feto na’in-500 resin iha Timor-Leste hodi hametin nafatin liña koordenasaun servisu ho organizasaun feto sira iha Timor-Leste no organizasaun internasionál sira.

Komandu PNTL liuhosi Gabinete Jéneru PNTL rasik kria ona planu no periodu 2018-2022 ne’ebé PNTL nu’udar defensór ba direitu no liberdade Timor-oan sira hotu nian (feto, mane, labarik mane no labarik feto sira) no fiador ba seguransa interna.

Bazeia ba Planu Estratéjia Dezenvolvimentu Nasionál (PEDN) no estratéjia PNTL, mandatu hosi Gabinete Jéneru Planu Asaun Nasional (PAN) 1325 no Planu Violénsia Bazeia ba Jéneru, PNTL dezenvolve ona Estratéjia jéneru ne’ebé intende atu atinje iha tinan 2022 hodi kontribui ba PNTL no fornese oportunidade hanesan ba feto no mane tuir sira-nia nesesidade no atinje ona prioridade jéneru.

Estratéjia Jéneru ne’e rasik define prioridade kona-ba oinsá hasa’e númeru partisipasaun feto iha rekrutamentu polísia foun no promosaun diviza atu envolve feto barak liu, nune’e iha balansu feto no mane tanba agora feto iha de’it %15 tanba ne’e, nia espera, iha tinan oin mai iha rekrutamentu no promosaun bele hasae partisipasaun feto ba %18.

Komandu PNTL rasik promete ona iha futuru envolve feto barak liu iha promosaun ba Postu Ofisiais, nune’e feto barak bele asume kargu hanesan Komandante munisípiu no segundu komandante munisípiu hodi luta maka’as liután ba igualdade jéneru iha instituisaun PNTL.

Komandu PNTL rasik harii Seksaun Jéneru ho objetivu atu bele ajuda orienta prosesu ida ne’ebé uniforme, sustentavel no kontinua ba abordajen jéneru ne’ebé integrada.

Baze legál kriasaun ne’e tuir Kódigu Prosesu Penál Timor-Leste nian no konvensaun kona-ba halakon diskriminasaun hotu-hotu hasoru Feto (CEDAW) ne’ebé mai ho nia funsaun halo ezbosu Polítika atu prepara PNTL nia Abordajen Integrada ba Jéneru.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here