Airnorth to’o iha Aeroportu Internasionál Prezidente Nicolau Lobato, Comoro. Imajen Tatoli/António Gonçalves

DILI, 30 juñu 2020 (TATOLI) – Governu liuhosi Autoridade Navegasaun Aéreu Timor-Leste (ANATL) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19 no haree ba Estadu Emerjénsia.

Ministru Transporte Komunikasaun, José Agostinho da Silva, informa Governu sei tetu vantajen no desvantajen sira hafoin reativa voo komersiál internasionál.

“Agora Timor-Leste mós iha ligasaun ho nasaun seluk durante ne’e. Iha mós aviaun ne’ebé maka opera mai ita-nia rai hanesan Sriwijaya, Citilink no Druk Air maibé bainhira atu normaliza voo komersiál ita sei prosede ba desizaun kolektiva Konsellu Ministru atu tetu no analiza  didi’ak risku vantajen no desvatajen bainhira foti desizaun,” dehan Ministru José Agostinho ba Agência Tatoli iha Palásiu Governu, foin lalais ne’e.

Governate ne’e hateten, daudaun ne’e parte Governu evita moras COVID-19 labele importa tanba ne’e seidauk reativa transporte aéreu maibé nafatin asegura konetividade Timor-Leste ba Austália.

“Maski Timor-Leste la rejista ona kazu ativu COVID-19, maibé globalmente moras ne’e sei iha. Ita-nia nasaun viziñu sira ho nasaun afetadu  sira mós balun moras sei iha, tanba ne’e kuandu ita normaliza ita bele hetan fali kazu importasaun, tanba ne’e maka ita antisipa labele akontese,” nia akresenta.

Governu Timor-Leste liuhosi Ministériu Transporte Komunikasaun (MTK) iha loron 7 abríl deside selebra akordu ho Airnorth, ne’ebé sei permite operasaun aéreu sira entre Dili no Darwin hodi garante kontinuasaun konetividade aérea nian ba Timor-Leste durante situasaun emerjénsia.

Servisu Airnorth funsiona atu tula materiál médiku no merkadoria sira iha situasaun emerjénsia.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no tama mai Timor-Leste liuhosi dalan fronteira terrestre no aeroportu.

Totál kazu konfirmadu ne’ebé rejista iha Timor-Leste hamutuk na’in-24 no provável na’in-haat, ne’ebé husi totál konfirmadu ne’e, na’in-22 rejista iha Dili enkuantu na’in-rua seluk rejista iha Munisípiu Liquiçá.

Iha loron 21 marsu, Timor-Leste rejista kazu pozitivu COVID-19 dahuluk ema na’in-ida no kazu ikus liu rejista iha loron 24 abríl.

Nune’e, iha loron 15 maiu, Sentru Integradu Kestaun Krize (CIGC, sigla portugés) deklara katak pasiente konfirmadu no provável rekuperadu hotu ona, maibé to’o oras ne’e ekipa saúde nafatin halo vijilánsia sentinela.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here